मृतक सीता भण्डारीको न्यायको लागि भन्दै करिब डेढ महिनादेखि रुपन्देहीमा सुरु भएको आन्दोलन रोकिएको छ । सीताका माइती पक्षले शवको अन्तिम संस्कार गरेका छन् । सीताको मृत्यु भएको ४६ दिनपछि उनको अन्तिम संस्कार भएको हो ।
सीताको रहस्यमय निधन भएको र परिवारलाई कारवाहीको दायरामा ल्याउनुपर्ने माग राखेर सीताको माइतीपक्षको आग्रहमा आन्दोलन शुरु गरिएको थियो । रुपन्देहीको मणिग्राममा बहुचर्चित भनिएको भण्डारी पौडेल मृत्यु घटना अन्ततः पैसाको लेनदेनमा सकिएको अभियानकर्मीहरुको आरोप छ ।
माइतीपक्षले सीताको श्रीमानका परिवारबाट ११ लाख रुपैयाँ लिएर सहमति गरेका छन् । उनीहरुले यस्तो सहमति गरेपछि जस्टिस फर सीता भन्दै अभियान चलाएकाहरु आश्चर्यमा परेका छन् ।
गत भदौ २० गते बिहान सीता आफ्नै कोठामा मृत फेला परेकी थिइन् । तिलोत्तमा नगरपालिका वडा नं ५ मणिग्रामस्थित घरमा मृत फेला परेकी सीताका माइतीले लामो समयदेखि आन्दोलन गर्दै आएका थिए । भण्डारीको मृत्यु भएको ४६ दिनपछि मात्रै माइतीपक्षले पौडेल परिवारबाट ११ लाख रुपैयाँको चेक बुझेपछि बुधबार अन्त्येष्टि गर्न सहमति दिएका थिए ।
तिलोत्तमा नगरपालिका र बुटवल उपमहानगरपालिकाको सीमा क्षेत्रमा रहेको मगरघाटमा माइतीपक्ष समेतको सहभागितामा बुधबार सीताको अन्तिम संस्कार गरिएको रुपन्देही प्रहरीले जनाएको छ।
तिलोत्तमा नगरपालिका – १७ गंगोलियामा रहेको मध्यस्थकर्ताको घरमा भएको लिखित सहमतिअनुसार सीताका भाइले भिनाजु (टीका पौडेल)लाई दिएको सापटी एक लाख रुपैयाँ र विवाह गर्दा लागेको खर्च बापतको १० लाख रुपैयाँको चेक सीताका ससुरा देवी पौडेलले दिएपछि सहमति भएको हो । माइतीपक्षले सीतालाई विवाहमा दिएको दाइजो यसअघि नै फिर्ता लगेका थिए ।
गत भदौ २० गते बिहान आफ्नै कोठामा झुण्डिएको अवस्थामा फेला परेकी सीताको न्यायको लागि भन्दै ‘जस्टिस फर सीता भण्डारी’ भन्ने अभियान सञ्चालन गरेर आन्दोलन जारी थियो ।
प्रहरीले अनुसन्धानको क्रममा सीताको मोबाइलबाट ‘..मलाई माफ गरिदिनुहोला, मेरो अर्को जुनी भयो भने म हजुरहरूकै काखबाट जन्मिन चाहन्छु, मलाई यो जिन्दगीबाट पुग्यो, म सकिनँ बाँच्न…’ भनी लेखिएको नोट फेला परेको थियो । तर माइतीपक्षले भने सीतालाई यस्तो अवस्थामा पुऱ्याउने उनकै परिवार हो भन्दै कारवाहीको माग राखेका थिए ।
सीताका बुबा हरिप्रसाद भण्डारीले जाहेरी दिएपछि सीताका श्रीमान् टीका पौडेल, आमाजु (दिदी) बिष्णु पौडेल र जेठाजु हरिप्रसाद पौडेल दुरूत्साहन मुद्दामा पुर्पक्षका लागि थुनामा गएका छन् । २७ वर्षीया सीता आफ्नै घर कोठामा मृत अवस्थामा फेला परेको सम्बन्धमा केन्द्रीय अनुसन्धान ब्युरोको सहयोगमा अनुसन्धान भएको थियो।
