काठमाडौं । सत्तारुढ दल नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा एकीकृत समाजवादीका अध्यक्ष माधवकुमार नेपाल प्रधानमन्त्री निवास पुगेका छन् ।
स्थानीय तहको निर्वाचन र एमसीसीबारे प्रधानमन्त्री शेरबहादुर देउवासित निर्णायक वार्ताका लागि प्रचण्ड र नेपाल बालुवाटार पुगेका हुन् ।
प्रधानमन्त्री देउवा चाँडोभन्दा चाँडो स्थानीय तहको निर्वाचन मिति घोषणा गर्ने पक्षमा छन् । आगामी जेठ ४ गते स्थानीय तहको निर्वाचन गर्नका लागि निर्वाचन आयोगसँग समझदारी पनि बनिसकेको छ ।
सत्तारुढ दल माओवादी र नेकपा एससित परामर्श गरी मन्त्रिपरिषद बैठक राखेर मिति घोषणाको तयारीमा देउवा छन् । आज बिहान बस्ने बैठकमा पनि सोबारेमा छलफल भएको थियो । साँझ बैठकमा छलफल गर्ने सहमति बनेको थियो ।
अहिले सबैभन्दा चोटिलो बनेको एमसीसीबारे माओवादी र नेकपा एसको असहमति छ । प्रधानमन्त्री देउवा एमसीसी पारित गर्ने विषयमा जसरी पनि अघि बढ्ने मनस्थितिमा छन् । आज बिहान भएको बैठकमा प्रधानमन्त्री देउवाले माओवादी केन्द्र र नेकपा एसको तर्फबाट एमसीसी सम्झौताका संशोधनका लागि विषय केके हुन् ? लिएर आउन भनेका थिए ।
साँझको भेटमा माओवादी केन्द्र र नेकपा एसको तर्फबाट संशोधनका बुँदा प्रस्तुत गरिने सम्भावना छ । यी दुवै दलले अहिलेको अवस्थामा एमसीसी पारित गर्न नसकिने बताइसकेको छ ।
