काठमाडौं । सत्ता गठबन्धनमा महानगरपालिका र उपमहानगरपालिका सहितका स्थानीय तहमा सिटको भागवण्डा मिलाउन सकस देखिएको छ । निर्वाचन नजिकिँदै सत्ता गठबन्धनमा रहेका दलबीचमात्र तालमेल गर्ने निर्णय भए पनि सिटको भागबण्डा नै टुंगिन बाँकी छ ।
निर्वाचन आयोगले वैशाख ३० गते हुने चुनावको लागि बैशाख ११ र १२ गते मनोनयनका लागि मिति तोकेको छ । मनोनयन दर्ता गर्न ६ दिनमात्र बाँकी रहँदा सत्ता गठबन्धनले उम्मेदवारी नै टुंग्याउन सकेको छैन ।
आइतर बसेको सत्ता गठबन्धनको बैठकमा नेकपा माओवादी केन्द्रले एक महानगर र चार उपमहानगरपालिकामा दाबी गरेको छ । नेपाली कांग्रेस, नेकपा माओवादी केन्द्र, नेकपा एकीकृत समाजवादी, जसपा र जनमोर्चाले ६ वटा महानगर र ११ वटा उपमहानगरपालिमा आ-आफ्नै अडान कायम राखेका छन् ।
भागवण्डा टुंग्याउन सोमबार (आज) बिहान ९ बजे पनि प्रधानमन्त्रीको सरकारी निवास बालुवाटारमा गठबन्धनको बैठक बस्ने भएको छ । आज बस्ने बैठकबाट सिटको बाँडफाँटबारे निर्णय हुनसक्ने बुझिएको छ। माओवादी केन्द्रले भरतपुर महानगरपालिकासँगै धरान, जितपुर सिमरा, हेटौंडा र घोराही उपमहानगरपालिकामा दाबी गरेको छ । एकीकृत समाजवादीले पोखरा महानगरमा दाबी गरेको छ ।
