सुर्खेत । अन्य समुदायसँग सम्पर्कमा बस्न नरुचाउने लोपोन्मुख राउटे समुदायका दुई युवतीमाथि भएको यौन दुव्र्यवहार र अश्लिल भिडियो सार्वजनिक भएपछि ती युवतीको ज्यानकै खतरा बढेको छ ।
आफूलाई जंगलको राजा ठान्ने राउटे समुदायको आफ्नै धर्म, कला संस्कृति र रीतिरिवाज छ । उनीहरु नियम र कानून पनि आफ्नै मान्छन् ।
उनीहरुका लागि देशको संविधान र कानून भन्दा मुखियाको आदेश ठूलो हुन्छ । आफ्नै अलिखित संविधान मान्ने यो समुदायको कानून झनै कठोर छ । परम्परादेखि मानिआएको कानूनमा मृत्युदण्डको सजाय समेत दिनसक्ने व्यवस्था छ ।
यस्तो कठोर कानून भएको राउटे समुदायका दुई युवतीको अश्लील भिडियो नै भाइरल भएपछि अहिले पीडित युवतीलाई कसरी बचाउने भन्ने चिन्ता बढ्न थालेको छ ।
आइतबार बिहानै राउटे युवतीहरूमाथि गुर्भाकोट सुर्खेतका केही युवाहरूले यौन दुर्व्यवहार गरेको घटना सार्वजनिक भएपछि पीडित युवतीहरु राउटे समुदायबाट नै मारिने डर पैदा भएको छ ।
आफना छोरीचेली, अन्य समुदायका पुरुषसँग बोलेमात्रै पाप ठान्ने यो समुदायका लागि यौन दुर्व्यवहार त जघन्य अपराध रहेको राउटे समुदायका जानकारहरु बताउछन् । ठूलो गल्तीलाई माफी नदिने यो समुदायले यौन दुव्र्यवहारका घटना थाहा पाए नस्वीकार्ने जानकारहरुको भनाइ छ । यस्तोमा मृत्युदण्डको सजाय हुन सक्छ । सजाय पाउनेलाई घरेलु हतियार प्रयोग गरेर मारिहाल्छन् ।
पीडित युवतीहरू आफ्नै समुदायबाट असुरक्षित भएपछि भाइरल भिडियो राउटे समुदायसम्म पुग्न नदिन प्रहरीले बाहिरी व्यक्तिहरुको आउजाउमा सख्त कठाइ गरेको छ ।
घटना थाहा पाउन सक्ने भएकै कारण पीडितसँग बयान समेत नलिइएको जिल्ला प्रहरी कार्यालय सुर्खेतका प्रवक्ता एवं डीएसपी रामप्रसाद घर्तीले बताउनुभयो । स्वास्थ्य परीक्षण गर्न सक्ने अवस्था नहुँदा अनुसन्धानमा समेत समस्या भएको उहाँले बताउनुभयो ।
घटना सार्वजनिक भएपछि कर्णाली प्रदेशका मुख्यमन्त्री महेन्द्रबहादुर शाही आफैंले पहलकदमी गर्नुभएको छ ।
परामर्श दिने उदेश्यले उहाँले राउटेका मुखियालाई बोलाउनुभएको छ । तर उनलाई पछिल्लो घटनाका बारेमा कुनै जानकारी गराइएको छैन ।
