हुम्ला- हुम्लाको सिमकोट ६ की २७ वर्षीया जगत माया रोकायालाई सुत्केरी व्यथा लागेको एक सातापछि उपचारका लागि जिल्ला बाहिर लगिएको छ ।
लगातार प्रसूति व्यथा लागे पनि समयमा उपचार हुन नसक्दा उनको पेटमा रहेको वच्चाको दुई दिनअघि नै मृत्यु भइसकेको छ । रोकायाको उपचारका लागि प्रयास भए पनि मौसममा आएको खराबीका कारण सम्भव हुन सकेको थिएन। सरकारले लगाएको निषेधाज्ञाका कारण हवाइ सेवा बन्द छन् भने जिल्लामा लगातार भएको वर्षाका कारण हेलिकप्टरले समेत उडान भर्न सकेका छैनन् ।
रोकायाको उद्दारका लागि हेलिकप्टर भने तयारी अवस्थामा राखिएको थियो । बच्चाको पेटभित्र मृत्यु भएको र निकाल्न ढिला हुँदा आमाको ज्यान समेत जोखिममा परेको थियो । मौसममा केही सुधार आएलगत्तै उनलाई उपचारका लागि सुर्खेतमा लगिइएको छ ।
