धनगढी । दार्चुलाको नौगाडमा पहिरोले पुरिएर एकै परिवारका दुईसहित तीन जनाको मृत्यु भएको छ । अविरल वर्षासँगै गाउँपालिका- ३ खार नजिकैको चौखुट्टेमा आएको पहिरोले घर पुरिँदा दुई जना र पहिरोमा परेर थप एक जनाको मृत्यु भएको प्रहरीले जनाएको छ ।
पहिरोले घर पुरिँदा स्थानीय ७२ वर्षीया गेउली ठगुन्ना र उनकी ३ महिनाकी नातिनी मन्जरी ठगुन्नाको मृत्यु भएको जिल्ला प्रहरी कार्यालय दार्चुलाका प्रमुख, प्रहरी नायब उपरीक्षक (डिएसपी) मनोहर भट्टले जानकारी दिए ।
यस्तै घट्ट जाने क्रममा आएको पहिरोमा परेर सोही ठाउँका २९ वर्षीय लक्ष्मण सितौलीको पनि मृत्यु भएको डिएपी भट्टले बताए । उनीहरू तीनै जनाको शव पहिरोबाट निकालिएको छ । पहिरोमा परेर सोही ठाउँका १८ वर्षीया हरमती ठगुन्ना सामान्य घाइते भएकी छन् ।
यस्तै, खार खोलामा आएको बाढीले सोही ठाउँमा रहेको ३२ किलोवाट क्षमताको खार खोला दोस्रो लघु जलविद्युत आयोजना पनि बगाएको छ । डीएसपी भट्टका अनुसार बाढीले जलविद्युत आयोजनाका सबै संरचना बगाएको छ ।
बाढीले खार र जामिर जोड्ने झोलुङ्गे पुल, तीनवटा निर्माणाधीन आरसीसी पुल, तीनवटा घट्ट र तीनवटा पानीको मुहान पनि खोलाले बगाएको छ ।
ठाउँमा पहिरोमा फसेका मानिसको उद्धारका लागि प्रहरी निरीक्षकको कमान्डमा टोली खटिएको छ । स्थानीयको सहयोगमा प्रहरीले उद्धारकार्य गरिरहेको छ । पहिरो गएको ठाउँमा जिल्ला सदरमुकामबाट झण्डै ८ घण्टाको पैदल दूरीमा पर्छ
