धनगढी । दुई दिनदेखि बेपत्ता भएर बुधबार मृत फेला परेका कैलालीको टीकापुरका पाँच वर्षीय बालकको हत्या भएको प्रहरीले निष्कर्ष निकालेको छ । उनको हत्या जामुन खान सँगै गएकी दिदीले गरेको प्रहरीले बिहीबार पत्रकार सम्मेलन गरेर सार्वजनिक गरेको छ ।
कैलाली प्रहरी प्रमुख एवं प्रहरी उपरीक्षक (एसपी) विश्व अधिकारीले प्रारम्भिक अनुसन्धानको क्रममा नाबालकको हत्या उनकै दिदीले गरेको देखिएको बताए । दिदी नाता पर्ने युवतीले जमरा कुलोमा धक्का दिएर विवेकको हत्या गरेको स्वीकारेको उनले बताए । प्रहरीका अनुसार ती युवतीले पारिवारिक रिसिबीका कारण बालकको हत्या गरेकी हुन् ।
प्रहरीले दिदी नाता पर्ने किशोरी र उनकी साथीलाई पनि पक्राउ गरेको छ । विवेकले लगाएको बाला ती युवतीको साथीसँग फेला परेकाले उनलाई पनि पक्राउ गरिएको एसपी अधिकारीले बताए । अदालतबाट म्याद थप गरी उनीहरुमाथि अनुसन्धान अगाडि बढाइएको उनले बताए ।
