बिहीबार राति आत्महत्या गरेकी अभिनेत्री तथा निर्माता जेनी कुँवरको शुक्रबार पशुपति आर्यघाटमा अन्त्येष्टी गरिएको छ । उनको पार्थिव शरीरलाई भतिज जीवन कुँवरले दागबत्ती दिए ।
अन्त्येष्टी अगाडि उनको पार्थिव शरीर अन्तिम श्रद्धाञ्जलीका लागि पशुपति क्षेत्रमै केही घन्टा राखिएको थियो । बिहीबार राति थापागाउँस्थित सनराइज अपार्टमेन्टमा रहेको आफ्नै निवासमा झुण्डिएर उनले आत्महत्या गरेकी थिइन् ।
ढोकामा किला ठोकेर डोरीको पासो लागेको अवस्थामा उनको शव प्रहरीले फेला पारेको थियो । शवसँगै उनले ‘डिप्रेशनको शिकार’ भएको नोट समेत राखेकी थिइन् । नोटमा उनले आफु ‘डिप्रेशनको शिकार’ भएको उल्लेख गर्दै मृत्युमा कसैलाई दोष नदिन र आफ्नै हिसाबले मृत्यु रोजेको भनेकी छन् ।
