कपिलवस्तु । नेपाली कांग्रेसको १४ औं महाअधिवेशन अन्तर्गत कपिललवस्तु जिल्लाका ९६ वडा मध्ये ९५ वडा र १० पालिका मध्ये ९ पालिकामा नेतृत्व चयन भएसँगै कांग्रेस कपिलवस्तुका नेताहरु तातेका छन् । आज गोरुसिंगे स्थित पौवा होटलमा कांग्रेस कपिलवस्तुका नेताहरु प्रदेश, संघ र जिल्लामा सर्वसम्मत नेतृत्व चयन गर्नका लागि बैठक बसेको कपिलवस्तु जिल्ला सभापति सुरेन्द्रराज आचार्यले बताए ।
वडा र पालिका अधिवेशन सम्पन्न भए पनि प्रदेश, संघ र जिल्लामा आगामी दिनमा सहमति मार्फत नेतृत्व चयन गरेर कपिलवस्तुबाट केन्द्रमै सकारात्मक सन्देश दिन बैठक आयोजना गरिएको बैठकमा सहभागी कांग्रेस नेता राजेश ज्ञवालीले बताए ।
बैठकमा सहभागी पूर्व मन्त्री तथा भारतका लागि पूर्व राजदूत दीपकुमार उपाध्यायले चाहना र इच्छा भए सम्भव हुने बताउँदै सहमति र सहकार्यबाट सर्वसम्मत नेतृत्व छनोट गर्नु पर्नेमा जोड दिए । बैठकमा सहभागी नेताहरुका अनुसार सर्वसम्मत नेतृत्व छनोटका लागि आज पहिलो बैठक बसेको र सर्वसम्मत नेतृत्व छनोटका लागि फेरि पनि बैठक बस्ने सहमति भएको छ । जिल्ला अध्यक्षका आंकाक्षीहरु सहित बसेको बैठकमा सहभागी नेताहरुले जिल्लामा सर्वसम्मत नेतृत्व छनोट गरेर जानुपर्नेमा जोड दिएको बैठकमा सहभागी नेताहरुले बताएका छन् ।
बैठकमा कमलेश कुमार शर्मा, अभिषेक प्रताप शाह, राजेश सिंह, राजेश आचार्य, सुधाकर पाण्डे, अब्दुल कलाम, केशव कुमार श्रेष्ठ, हरिराज घिमिरे, लोकनाथ शर्मा, सोहरत तेली, अजय थापा, राजेश ज्ञवाली, विरेन्द्र मिश्र लगायतको सहभागिता रहेको थियो ।
