कपिलबस्तु, असार १७ गते । कपिलबस्तुमा सञ्चालित होटल तथा रेष्टुरेण्टहरुलाई खाद्य स्वच्छताको आधारमा वर्गिकरण गरिएको छ । खाद्य प्रविधि तथा गुण नियन्त्रण डिभिजन कार्यालय कपिलबस्तुले बुद्धभुमि, बाणगंगा र कपिलबस्तु नगरपालिका भित्र रहेका होटल रेष्टुरेण्टहरुको खाद्य स्वच्छताको आधारमा होटल रेष्टुरेण्ट स्तरीकरण गरेको हो ।
खाद्य प्रविधि तथा गुण नियन्त्रणद्वारा गरिएको अनुगमनको क्रममा होटल मायाज इन्टरनेशनल प्रालिले उत्तम श्रेणीको स्टीकर प्राप्त गर्न सफाल भएको र यसले गर्दा मैले ठिक ठाँउमा लगानी गरेको होटल सञ्चालक हरि शर्माले बताउनुभयो ।
होटल तथा रेष्टुरेण्टहरुलाई गरिएको वर्गिकरणमा सन्तोषजनक श्रेणिको स्टीकर प्राप्त गरेको र आउने दिनमा अति उत्तम श्रेणिको स्टीकर प्राप्त गर्न होटलमा भएको कमी कमजोरीलाई सुधार गरी लैजाने प्रेम सागर होटलका सञ्चालनक सिम कुमार श्रेष्ठले बताउनुभयो ।
कपिलबस्तुले बुद्धभुमि, बाणगंगा र कपिलबस्तु नगरपालिका भित्र रहेका दुई दर्जन होटल रेष्टुरेण्टहरुको अनुगमन गरी खाद्य स्वच्छताको आधार होटल स्तरीकरण निर्देशिका २०७४ बमोजिम लोगो वितरण गरिएको डिभिजन कार्यालयका प्रमुख शिव शंकर मिश्राले बताउनुभयो । निर्देशिकामा भएका ५० वटा मापदण्डलाई मध्यनजर गर्दे होटल तथा रेष्टुरेण्टको स्तरीकरण गरिएको उहाँले बताउनुभयो । जसमा १५ वटा होटल तथा रेष्टुरेण्टहरुले स्तरिकरणको आधारमा लोगो लिन सफल भएको जसमध्ये ८ वटा सन्तोषजनक, ४ वटा उत्तम र ३ वटाले सामान्य लोगो प्राप्त गरेको प्रमुख मिश्राले बताउनुभयो ।
खाद्य प्रविधि तथा गुण नियन्त्रण डिभिजन कार्यालय, कपिलबस्तुले कार्यक्षेत्रका होटेल रेष्टुरेन्टहरुको स्तरीकरण तथा नविकरण, खाद्य उद्योग, बजार अनुगमन समेत गर्दै आएको छ । स्तरिकरण कार्यक्रमबाट उपभोक्ताले स्वस्थ खाद्य पदार्थ उपभोग गर्ने सुनिश्चितता प्राप्त गर्दछन भने होटेल व्यवसायीले समेत खाद्य स्वच्छता रहेको प्रमाण देखाउन सक्छन ।
सो आवसरमा जिल्ला प्रशासन कार्यालयका नासु सिता बन्जाडे, वरिष्ठ प्रहरी नायब निरिक्षक लिला बहादुर कुवंर, होटल तथा रेष्टुरेण्ट व्यवसायी संघका प्रतिनिधि, पत्रकार लगायतको सहभागिता रहेको थियो ।
खाद्य स्वच्छताको आधारमा होटल तथा रेष्टुरेण्टलाई वर्गिकरण
