प्रतिनिधि सभाको उपसभामुखमा पुष्पा भुसाल निर्वाचित भएकी छन् । शुक्रबार संसदमा भएको मतदानमा पाँचदलीय गठबन्धनकी साझा उम्मेदवार नेपाली कांग्रेसकी सांसद भुसालले १४८ मत पाइन् ।
२०७६ साल माघ ६ गते तत्कालीन उपसभामुख शिवमाया तुम्बाहाम्फेले राजीनामा दिएपछि अहिलेसम्म खाली रहेको यो पदमा आज चुनाव भएको हो ।
अर्घाखाँची पोखराथोककी पुष्पा भुसाल २०२८ सालदेखि राजनीतिमा आवद्ध छिन् । सत्ता गठबन्धनबाट नेपाली कांग्रेसकी भुसाललाई माओवादी केन्द्र, एकीकृत समाजवादी पार्टी, जनता समाजवादी पार्टी, लोकतान्त्रिक समाजवादी पार्टी, राष्ट्रिय जनमोर्चा लगायत दलको साथ रहेको थियो ।
एमालेकी भट्टराईलाई राप्रपा र मजदूर किसान पार्टीको समर्थन छ। संसदमा एमालेको ९८ र स्वतन्त्रको २ मत छ।
को हुन् भुसाल ?
अर्घाखाँची क्षेत्र नं. २बाट निर्वाचित पुष्पा भुसाल नेपाली कांग्रेसका सभासद हुन् । २०५६ को संसदीय निर्वाचनमा समेत सोही क्षेत्रबाट सहभागी भुषालले १७ वर्ष त्रिभुवन विश्वविद्यालयमा प्राध्यापन गरेकी छिन् । कानुन व्यवसायीसमेत रहेकी भुषाल नेपाली कांग्रेसकी शिक्षित एवं वाकपटुता भएकी नेतृका रुपमा परिचित छन् ।
कानुनमा स्नातक र राजनीतिशास्त्रमा स्नातकोत्तर भुषाल अध्ययनका साथै समाचार सुन्न विशेष रुचि राख्निछन्। नेपाल वार एसोसिएसनका केन्द्रीय सदस्य रहिसकेकी ४७ वर्षीया भुसाल एक छोरीकी आमा हुन् । पुष्पा चर्चित डाक्टर एवं पूर्वराजदूत डा. चोपलाल भुषालकी पत्नी हुन् ।
राजनीतिक पृष्ठभूमीकी भुषालका बुवा २०१५ सालको बी.पी.कोइरालाको मन्त्रिपरिषदमा स्वास्थ्य मन्त्री रहेका थिए । २०१७ सालमा राजा महेन्द्रको कदमपछि १४ वर्ष पिता काशीनाथ गौतमसहित भारत निर्वासित भएका थिए । त्यही अबधिमा आफूले राजनीतिमा लाग्ने अठोट गरेको बताउने भुषाल २०२८ सालदेखि सक्रिय राजनीतिमा होमिएकी हुन् । हाल उनी पार्टीको केन्द्रीय कानुनी सल्लाहकार समितिका सदस्य, केन्द्रीय महिला विभाग सदस्य र नेपाल महिला संघको महासचिव हुन्।
पार्टीमा निरन्तरता, इमान्दारी, कटिबद्धता र जिल्लावासी सँगको निकट सम्बन्ध राख्न सफल भुषाल लुम्बिनी अञ्चलको मात्र नभई नेपाली कांग्रेसकै उत्कृष्ट नेतृका रुपमा आफूलाई स्थापित गर्न सफल भएकी छिन् ।
भुसाल यसअघि पनि उपसभामुख उम्मेदवार भएर पराजित भएकी थिइन्। २०७४ चैतमा भएको चुनावमा भुसाललाई एमालेकी शिवमाया तुम्बाहाङ्फेले हराएकी थिइन्। तत्कालीन उपसभामुख शिवमाया तुम्बाहाङ्फेले ६ माघ २०७६ मा राजीनामा दिएपछि संसद्ले उपसभामुख पाएको छैन।
