नागरिकता ऐनको संशोधन विधेयक दुवै सदनबाट पारित भएकोमा खुसी व्यक्त गर्दै नेपाली काँग्रेस कपिलवस्तुको आयोजनामा तौलिहवामा दिपावलीको आयोजना गरिएको छ ।
पार्टीको आयोजनामा जिल्ला प्रशासन चौक तौलिहवामा दिपावली गरि नागरिकता नागरिकता ऐनको संशोधन विधेयकको स्वागत गरिएको हो । बिधेयक पारित भएको खुसीयालीमा गरिएको दिपावलीको कार्यमा पार्टीका सहभागी कपिलवस्तु नगरपालिका सभापति खुर्सेद अहमद खाँ, पुर्व सभापति सुधाकर पाण्डेय, लुम्बिनी प्रदेश सदस्य रवि ठाकुर, युवा नेता प्रकाश घिमिरे, रामआशीष पाण्डेय, दिपेन्द्र शुक्ला लगायतका नेताहरुले सम्बोधन गरेका थिए ।
सो क्रममा बोल्ने अधिकांस बक्ताले बिधेयकको बिरोध गर्नेहरु नश्लवादले प्रेरित रहेको र समाजमा बैमनस्यता फैलाउने काम गरेको आरोप लगाए । सरकारले पेश गरेको नागरिकता ऐनको संशोधन विधेयक बिहिबार राष्ट्रियसभाबाट पनि पारित भएको छ । यो विधेयकलाई प्रतिनिधिसभाले ६ साउनमा पारित गरेको थियो । अब यो विधेयक राष्ट्रियसभाले प्रतिनिधिसभामा नै फिर्ता पठाउनेछ र प्रतिनिधिसभाले राष्ट्रपतिसमक्ष पठाउनेछ ।
राष्ट्रपतिले प्रमाणीकरण गरेपछि कार्यान्वयन हुनेछ । यो विधेयक पारित भएपछि जन्मको आधारमा नेपाली नागरिकता पाएकाहरुको सन्तानले वंशजको नागरिकता पाउनेछन् । त्यस्तै बाबुको पहिचान हुन नसकेकाहरुले आमाको नामबाट पनि नागरिकता लिन पाउने भएका छन् । नागरिकता ऐनको संशोधन विधेयक पारित हुदाँ आफनै देशमा रहेर पनि अनागरिक सरह हुनु परेकाले नागरिकता पाउने बातावरण बनेको नेपाली काँग्रेस कपिलवस्तुका जिल्ला सभापति अब्दुल कलाम खाँले बताए ।
देश र मधेसकै एउटा समस्याको रुपमा रहेको नागरिकताको बिषय नेपाली काँग्रेस पार्टीको नेतृत्वमा ल्याईएको बिधेयक पारित भए सगै समाधानको बाटोमा अगाडि बढेको भन्दै उनले खुसी व्यक्त गरे ।
