सुर्खेत, साउन १७ गते । कर्णाली प्रदेशका ११ वटा स्थानीय तहमा रहेका १०९ वटा विद्यालयमा नर्स राखिने भएको छ । विद्यालय नर्स कार्यक्रम अन्तर्गत विद्यालयमा नर्स राखिने भएको हो । विद्यालय तहबाट नै बालबालिकालाई स्वस्थ जीवनशैली अपनाउन प्रेरित गर्ने उद्देश्यले यस कार्यक्रमले लिएको छ ।
स्वास्थ्य तथा जनसंख्या मन्त्रालयका अनुसार कर्णाली प्रदेशका ११ स्थानीय तहका १०९ वटा विद्यालयमा नर्स राखेर यस वर्षदेखि विद्यालय नर्स कार्यक्रम सुरु हुनेछ । जस अन्तर्गत सुर्खेतको वीरेन्द्रनगर नगरपालिका भित्रका २०, भेरीगंगा नगरपालिकाका -१० वटा विद्यालय रहेका छन् । दैलेखको नारायण नगरपालिकाका -१०, कालिकोटको खाँडाचक्र नगरपालिकाका -१० वटा विद्यालय, जुम्लाको चन्दननाथ नगरपालिकाका -५ वटा, डोल्पाको त्रिपुरासुन्दरी नगरपालिकाका -५ वटा विद्यालय, हुम्लाको सर्केगाड गाउँपालिकाका -४ वटा विद्यालय रहेका छन् ।
त्यस्तै, सल्यानको शारदा नगरपालिकाका -१० वटा विद्यालय, त्रिवेणी गाउँपालिका भित्रका ११ वटा विद्यालय, जाजरकोटको छेडागाड नगरपालिकाक -१४ र रूकुमपश्चिमको मुसिकोट नगरपालिका भित्रका १० वटा विद्यालयमा नर्स राखिने भएको छ । एक विद्यालय एक नर्स कार्यक्रम तत्कालीन स्वास्थ्य मन्त्री गगन थापाले सुरु गर्नुभएको थियो ।
