स्वास्थ्य चौकी र बर्थिङ सेन्टरको उद्घाटन

कपिलवस्तु २३ असार
कपिलवस्तुको महाराजगंज नगरपालिका वडा नम्बर ४ बरईपुरमा नव निर्मित स्वास्थ्य चौकी भवन र बर्थिङ सेन्टरको उद्घाटन गरिएको छ । लुम्बिनी प्रदेश सरकारका स्वास्थ्य मन्त्री राजु खनालले रिबन काटेर भवनको उद्घाटन गर्दै प्रदेश सरकारले प्रदेशभरीको स्वास्थ्य संस्थाहरुलाई बलियो बनाउदै लाने बताए । उनले सरकारी स्वास्थ्य संस्थाहरुबाट प्रभावकारी सेवा प्रदान गर्न आवश्यक बजेट बिनियोजनका लागि आफुले पहल गरेको बताए ।
उनले ६० बर्ष उमेर पुगेका महिला स्वयमसेविकालाई प्रदेश सरकारले सम्मान गर्ने समेत जनाए । उनले स्वास्थ्य बिमा सेवा कार्यक्रमलाई प्रभावकारी रुपमा लैजानु पर्ने बताए । सो अवसरमा उनले महाराजगंज नगरपालिका वडा नम्बर १ स्थित प्राथमिक सेवा उपचार केन्द्रमा रहेको मेडिकल स्टोरको समेत उदघाट गरे ।
सो अवसरमा मेयर अब्दुल कलाम खाले महाराजगंज नगरपालिकाले स्वास्थ्य क्षेत्रलाइै प्राथमिकतामा राखेको बताए । उनले नगरपालिकाको ११ वटै वडामा रहेको स्वास्थ्य चौकी भवन निर्माण गरी, बर्थिङ सेन्टर समेत संचालन गर्दै गएको बताए । नगरपालिका भित्र सुबिधा संपन्न अस्पताल समेत निर्माणाधीनको क्रममा रहेको र एम्बुलेन्स सेवालाई समेत संचालन गरिएको बताए ।
उनले स्वास्थ्य बिमा कार्यक्रम समेत अब संचालन गरिने बताए । कार्यक्रममा पुर्व प्रदेश मन्त्री रिना नेपाल, उप मेयर रिता कुमारी चौधरी निमित्त प्रमुख प्रमुख प्रशासकीय अधिकृत निरंजन पौडेल, वडा नम्बर १ का अध्यक्ष प्रमोद चौधरी, ८ का अध्यक्ष जोगेन्द्र सिंह लगायतको सहभागीता थियो ।