पाल्पा, साउन ८ गते । पाल्पामा क्रियाशील चार दलले समाजवादी मोर्चा गठन गरेका छन् । नेकपा (माओवादी केन्द्र), नेकपा (एकीकृत समाजवादी), नेपाल कम्युनिष्ट पार्टी र जनता समाजवादी पार्टीले संयुक्त समाजवादी मोर्चा गठन गरेका हुन् ।
समाजवादी मोर्चाले पूर्व सासंद तथा नेकपा (एकीकृत समाजवादीका) जिल्ला इन्चार्ज यादव बहादुर रायमाझीलाई संयोजक तोकेको छ । केन्द्रमा बनेको मोर्चाजस्तै पाल्पामा पनि बनाइएको दलका नेताहरू बताउनुभएको छ । मोर्चाले साझा बुझाई र प्रतिबद्धताका आधारमा काम गर्ने नेकपा (माओवादी केन्द्र) पाल्पाका संयोजक राजेन्द्र विश्वकर्माले जानकारी दिनुभयो ।
मोर्चाको गठनसँगै चार दलले संयुक्त रुपमा पाल्पाका प्रमुख जिल्ला अधिकारी बन्धुप्रसाद बास्तोलालाई विभिन्न विषय समेटेर ध्यानाकर्षण पत्र बुझाएको छ । मोर्चाले सरकारको सेवा प्रभावकारी बनाउन, सुशासन कायम गर्न, विद्युत, खानेपानी तथा सार्वजनिक यातायातको भाडा समायोजनजस्ता विषयमा ध्यान दिन आग्रह गरेको छ ।
जिल्लामा रहेको टिप्परबाट भएको सडकको दुरावस्था, स्थानीय तहमा देखिएको ढिलासुस्ती, अनियमितता, खानीमा देखिएको समस्या समाधान गर्न पहल गर्न आग्रह गरेको छ । ध्यानाकर्षणपत्र बुझ्नुहुँदै प्रजिअ बास्तोलाले आफूले जिल्लामा देखिएका विविध खालका समस्या समाधानमा पहल र आवश्यक समन्वय गर्ने बताउनुभयो ।
