स्याङ्जा, साउन १७ गते । पुर्वाधार बिकास कार्याल स्याङ्जाले एकै आर्थिक बर्षमा ४२.६५ किमी सडक कालोपत्रे तथा ढलान गरेको छ । गण्डकी प्रदेशको भौतिक पुर्वाधार तथा यातायात मन्त्रालयको पूर्वाधार बिकास कार्याल स्याङ्जाले आर्थिक बर्ष २०७९–८० मा २२ किमी कालोपत्रे र २०.६५ किमी ढलान गरेको हो ।
यहाँको अर्जुन चौपारी सडक (आउँपालिका सदरमुकाम जोड्ने) सडक छ किमी, मिर्दी क्याक्मी भिमाद सडक स्याङजा खण्ड १० किमी, नागडाँडा कार्कीनेटा स्तरोन्नति दोस्रो खण्ड ६ किमी पूर्वाधार कार्यालयले डीबीएसटी कालोपत्रे गरेको हो ।
पूर्वाधार बिकास कार्याल स्याङ्जाका प्रमुख सन्तोष अर्यालले सडक कालोपत्रे २७ करोड ६ लाख रुपियाँमा गरेको बताउनुभयो । यस्तै, ढलानतर्फ दामाचौर हिलामराङ भिमाद सडक ३ किमी, शुक्लागण्डकी दुलेगौडा चिसापनी (गाउँपालिका केन्द्र जोड्ने) २.७ किमी, बायटारी उदियाँचौर सेतिबेनी सडक १ किमीसहितका १३४ सडक ढलान गरेको अर्यालले बताउनुभयो ।
यहाँका अन्य सडकहरु ३० मिटरदेखि आधा किलोमिटरसम्म ढलान भएका पुर्वाधार कार्यालयले जनाएको छ । यहाँ ढलानतर्फ ८२ करोड ९७ लाख रुपियाँ खर्च भएको बताउँदै अर्यालले स्थानीय स्रोत र देशमै उत्पादन भएको रड र सिमेन्टको प्रयोग गरेर ढलानमा ध्यान दिएको बताउनुभयो ।
इन्जिनियर दिपेस लिगलले स्याङ्जामा अघिल्लो आबमा ३३ किमी ढलान भएको बताउँदै आगामी आर्थिक बर्षमा अहिलेभन्दा धेरै सडक कालोपत्रे र ढलान हुने बताउनुभयो ।
आगामी आर्थिक बर्षका लागि १६ वटा सडक बहुबर्षीय रहेको र प्रदेश तथा संघको बजेट समेत धेरै रहेकाले कालोपत्रे र ढलान समेत धेरै हुने लिगलले बताउनुभयो । यहाँ पुर्वाधारले ५३ वटा सडकको कटान, मेसिनेरीवाल, नाला बनाएको छ भने एक सडक पुल, तीन झोलुङ्गे पुल, तीन कल्भर्ट, पाँच वटा कजवे र दुई वटा भवन समेत बनाएको हो ।
पुर्वाधारमा आएको एक अर्ब ५१ करोड आठ लाख ६६ हजार रुपियाँमा एक अर्ब एक करोड ८६ लखा १३ हजार रुपियाँ बराबरको प्रगति गरेको छ ।
