गुल्मी, भदौ १२ गते । गुल्मी अस्पतालमा उपचारका क्रममा बालिकाको मृत्यु भएपछि तनाव सिर्जना भएको छ । गुल्मी जिल्ला अस्पताल गुल्मीमा उपचारको क्रममा छिमेकी जिल्ला अर्घाखाँचीको छत्रदेव गाउँपालिका-७ भजुखर्क निवासी राजेश मरासिनीकी छोरी ४ वर्षीय प्रशंसा मरासिनीको उपचारको क्रममा ज्यान गएको थियो ।
मरासिनीका आफन्तजनहरूले अस्पतालको लापरबाहीका कारण ज्यान गएको बताएका छन् । सोमबार १० बजे अर्घाखाँचीको छत्रदेव गाउँपालिका-७ भजुखर्क निवासी राजेश मरासिनीको छोरी वर्ष ४ कि प्रशंसा मरासिनी पेट दुख्ने, वान्ता हुने बिरामी भई जिल्ला अस्पताल तम्घास ल्याई ओपिडीमा राखेर उपचार गरिएको थियोे ।
सोही दिन साँझ ५ बजे भर्ना भई उपचार गरिएकोमा मङ्गलबार बिहान साढे ६ बजे ईन्जेक्सन लगाएपछि बिरामी गम्भीर भई डाक्टरले चेकजाँच गर्ने क्रममा ८ बजे उपचारको क्रममा मृत घोषणा गरेका थिए । मृतकका बाबु, आफन्तहरुले डाक्टरको लापरबाहीले गर्दा मृत्यु भएको भन्दै अस्पताल घेराउ गरेका छन् ।
घटनाका विषयमा रेसुङ्गा नगरपालिकाका नगरप्रमुखसहित परिवारजनलगायत पत्रकारहरूको सहभागितामा अहिले छलफल भइरहेको छ । लापरबाही गर्नेलाई कडा कारबाहीको परिवारजनले माग गरेका छन् ।
