प्रेस यूनियन लुम्बिनी प्रदेशको भेला स्वर्गद्वारीमा

साझा न्यूज । कपिलबस्तु
नेपाल प्रेस यूनियन लुम्बिनी प्रदेशको प्रदेश भेला प्यूठानको स्वर्गद्वारीमा गर्न लगेको छ । उक्त भेला यही भदौ २२ र २३ गते लुम्बिनी प्रदेशको पवित्र धार्मिकस्थल स्वर्गद्वारीमा आयोजना गरिएको हो । भेलामा लुम्बिनीका १२ जिल्ला कार्यसमितिका पदाधिकारीको सहभागिता रहने युनियनका प्रदेश महासचिव नवीन गिरीले बताए ।
भेलाको लागि मूल समिति बनाइएको छ । सो भेला युनियनका प्रदेश उपाध्यक्ष पहलमान घर्तीको संयोजकत्वमा प्रदेश भेला तयारी मूल समिति गठन गरेर तयारी अगाडि बढाइएको महासचिव गिरीले जानकारी दिए । जसको सहसंयोजकमा प्यूठान शाखा अध्यक्ष मधुसुदन भण्डारी छन् ।
यस्तै सचिव शमशेर विक्रम जिसीको संयोजकत्वमा अतिथि सत्कार, भोजन तथा आवास व्यवस्थापन तयारी समिति, सचिव सूर्य भुषालको संयोजकत्वमा घोषणापत्र मस्यौदा समिति र कोषाध्यक्ष सीपी खनालको संयोजकत्वमा आर्थिक संयोजन समिति गठन गरिएको महासचिव गिरीले बताए ।
हुना लागेको भेलामा नेपाल प्रेस युनियनको संगठन सुदृढीकरण अभियान, पत्रकार प्रशिक्षण बर्ष २०८० कार्यान्वयन, नेपाल पत्रकार महासंघको सदस्यता शुद्धिकरण अभियान लगायतका विषयमा छलफल हुनेछ । भदौ १३ गते लुम्बिनी प्रदेश अध्यक्ष सुदीप गौतमको अध्यक्षतामा बसेको सचिवालय बैठकले केन्द्रिय सचिवालय बैठकको निर्णय बमोजिम प्रदेश भेला गर्ने निर्णय गरेको थियो ।