भारत न्युजिल्यान्डलाई हराउँदै विश्वकप क्रिकेटको फाइनलमा

भारत न्युजिल्यान्डलाई हराउँदै आईसीसी एकदिवसीय विश्वकप क्रिकेटको फाइनलमा पुगेको छ । आज बुधवार राति भएको पहिलो सेमिफाइनल खेलमा न्युजिल्यान्डलाई भारतले ७० रनले हराएको छ ।
भारतले दिएको ३ सय ९८ रनको विशाल लक्ष्य पछ्याएको न्युजिल्यान्ड ४८ ओभर ५ बलमा ३ सय २७ रनमा अलआउट भएको थियो । न्युजिल्यान्डका ड्यारेल मिचेलले शतक बनाएका थिए । उनी १ सय १९ बलमा १ सय ३४ रन बनाएर आउट भएका थिए । यस्तै कप्तान केन विलियमसनले ६९ रन बनाएका थिए ।
बलिङतर्फ भारतका मोहम्मद शमीले ७ विकेट लिएका थिए । यसअघि मुम्बईको वानखेडे स्टेडियममा टस जितेर ब्याटिङ गरेको भारतले निर्धारित ५० ओभरमा ४ विकेट गुमाएर ३ सय ९७ रन बनाएको हो ।
भारतका विराट कोहली र श्रेयस अय्यरले शतक बनाएका थिए । कोहली १ सय १३ बलमा १ सय १७ र अय्यर ७० बलमा १ सय ५ रन बनाएर आउट भएका थिए । यस्तै शुभमन गिलले ६६ बलमा ८०, कप्तान रोहित शर्माले २९ बलमा ४७ र केएल राहुलले २० बलमा ३९ रन बनाएका थिए । बलिङतर्फ न्युजिल्यान्डका टिम साउथीले ३ विकेट लिएका थिए ।
योसँगै भारतले ४ वर्षअघिको बदला लिएको छ । सन् २०१९ को एकदिवसीय विश्वकपमा म्यानचेस्टरमा भएको पहिलो सेमिफाइनल खेलमा भारतलाई हराउँदै न्युजिल्यान्ड फाइनलमा पुगेको थियो ।
अब भारतले फाइनलमा भोलि बिहीवार कोलकाताको इडेन गार्डेनमा हुने दोस्रो सेमिफाइनल खेलको विजेतासँग खेल्नेछ । भोलि अस्ट्रेलिया र दक्षिण अफ्रिका खेल्दैछन् । फाइनल खेल आइतवार अहमदाबादमा हुनेछ ।