साझा न्यूज । कपिलवस्तु
समुदाय स्तरमा कुपोषणको अन्त्य गरी पोषणको अवस्था सुधार गर्नका लागि शुद्धोधन गाउंपालिकाको लबनीमा खाद्य प्रणालीको पोषिलो खाना प्रदर्शनी मेला २०८१ सम्पन्न गरिएको छ । डब्लु.एच.एच.को आर्थिक सहयोगमा संचालित सुधारिएको खाद्य प्रणाली परियोजना अन्र्तगत कालिका स्वावलम्वन सामाजिक केन्द्र र फर्वाड नेपालको समन्वय तथा शुद्धोधन गाउंपालिकाको आयोजनामा कार्यक्रम सम्पन्न भएको हो ।
प्रदर्शनीमा पोषणमूलक विभिन्न खाले २२ वटा स्टलहरु राखिएका थिए । पोषण वगैचामा उत्पादन गर्न सकिने तरकारी तथा फलफुल, स्थानीय पोषणयुक्त खानाका परिकार, दुधजन्य उत्पादन, स्थानीय कृषि उत्पादन र स्वस्थ्य सेवा सामाग्री प्रदर्शन गरिएको थियो ।
कालानमक चामलको खीर, कोदोको सेल रोटी, ढिकरी, फारा, कर्कलोको पकौडा, गुलगुला, सातु, भेली, रामदानाको लड्डु लगायतका स्थानीय पोषिलो खानाका परिकारहरु स्टलमा राखिएका थिए । स्टलमा जैविक विषदी बनाउने उपाय, माछा र कुखुरा पालन बारेमा पनि प्रदर्शनी गरिएको थियो ।
समुदाय स्तरमा देखिएको कुपोषणको भयानक अवस्थाको सुधारका लागि स्थानीय सामाग्रीको उत्पादन र उपभोग गरी गाउं घरमै पोषिलो खानेकुरा तयार गर्न सकिने सन्देश प्रवाह गर्न प्रदर्शनीको आयोजना गरिएको सुधारिएको खाद्य प्रणाली परियोजनाकी कार्यक्रम संयोजक कमला सापकोटाले बताईन् ।
पोषिलो खाना प्रदर्शनी मेलाको सहआयोजकको रुपमा स्थानीय संस्थाहरु जनकल्याण युवा क्लब, शुद्धोधन किशोर किशोरी संजाल र शुद्धोधन युवा क्लब रहेका थिए । सो अवसरमा परियोजनाले गठन गरेका शुद्धोधन गाउंपालिकाका विभिन्न वडाहरुका २२ वटा समूहका सदस्यहरु, अगुवा कृषक, स्थानीय सर्वसाधारण लगायत ५ सय बढीले मेलाको अवलोकन गरेको सुधारिएको खाद्य प्रणाली परियोजनाका नागरिक समाज परिचालन तथा वकालत अधिकृत अशोक चन्द्र लम्सालले बताए ।
प्रदर्शनी मेलामा जिल्ला समन्वय समितिका प्रमुख बाबुराम आचार्यले आम सर्वसाधारणमा पोषण स्वास्थ्य सम्वन्धी सचेतना र पोषणयुक्त आनीवानीको विकास गर्न सके मात्रै जिल्लामा पोषणको अवस्थामा सुधार आउन सक्ने बताए । सो प्रदर्शनीको अवलोकन गर्दै लुम्विनी प्रदेश सभा सदस्य मधु सुदन शरण चौधरीले गाउंघरमै हुने पोषिलो खाद्य वस्तुको पहिचान र यसको प्रयोगमा बढावा दिन यस्ता प्रदर्शनीहरु निकै फलदायी हुनेमा जोड दिए ।
कार्यक्रममा शुद्धोधन गाउंपालिका प्रमुख कमलेश शरण चौधरीले घर घरमा पोषण स्वास्थ्य सन्देश पुर्याएर आफ्नो पालिकाका नागरिकहरुलाई पोषणयुक्त बनाउन आफुले पालिका स्तरबाट गर्न सक्ने सक्दो सहयोग गर्ने प्रतिवद्धता जनाएका छन् ।
