साझा न्यूज । कपिलवस्तु
तौलिहवा क्षेत्रमा पहिलो पटक आयोजना गर्न लागिएको राम कथा ज्ञान महायज्ञ २०८१ को सम्पूर्ण तयारी अन्तिम चरणमा पुगेको छ । आईतवारबाट शुरु गर्न लागिएको महायज्ञका लागि यज्ञ मण्डप निर्माण, कलश यात्राको तयारी, कथा वाचनका लागि स्टेज, कथा श्रवण स्थल लगायतका सम्पुर्ण तयारीहरु अन्तिम चरणमा पुगेकाे राम कथा ज्ञान महायज्ञ आयोजना मुल समितिका अध्यक्ष विरेन्द्र चौधरीले बताए ।
महायज्ञ शुभारम्भ गर्नका लागि आईतवार विहान ११ बजे १ हजार ८ वटा माटो र तामाको कलश सहितको यात्रा वाणगंगा नदीको रामघाटबाट जल भरेर तौलिहवा बजार परिक्रमा गरी यज्ञ मण्डपमा राखिने कलश यात्रा कार्यक्रमकी संयोजक सविता श्रेष्ठले बताईन् ।
९ दिन सम्म संचालन गरिने राम कथा ज्ञान महायज्ञका लागि कुल करीब ४० लाख रुपैया खर्च हुने अनुमान गरिएको छ । महा यज्ञ सम्पन्न गर्न स्थानीय सनातनी धर्मावलम्वीहरु संग स्वेच्छिक चन्दा संकलन गरिएको छ ।
सनातन धर्म संस्कृति जगेर्नाका लागि गर्न लागिएको महायज्ञमा आफुले सक्दो सहयोग गर्ने शुद्धोधन गाउंपालिकाका प्रमुख कमलेश शरण चौधरीले बताए । महायज्ञ आयोजना स्थल तौलिहवा स्थित खेलमैदानमा पुगेका गाउंपालिका प्रमुख चौधरीले साझा न्यूजसंग कुरा गर्दै धर्म संस्कृति रक्षाका लागि संचालन गरिने यस्ता कार्यक्रमहरुलाई सवै क्षेत्रबाट सहयोग गर्नु पर्नेमा जोड दिएका छ ।
महायज्ञमा आचार्य पण्डित रमोज वत्स जी महाराजले कथा बाचन गर्नेछन् । महायज्ञ अवधिमा विभिन्न खाले झांकी तथा सांस्कृतिक कार्यक्रमहरु समेत प्रदर्शन गरिने आयोजक समितिका अमेरिका प्रसाद चौधरीले बताए ।
महायज्ञलाई भव्यताका साथ सम्पन्न गराउन सवै क्षेत्रबाट सहयोग गर्न लुम्विनी प्रदेश सभा सदस्यहरु सुधाकर पाण्डेय र मधुसुदन शरण चौधरीले आआफ्ना क्षेत्रका सर्वसाधारणहरुलाई आग्रह समेत गरेका छन् । तौलिहवा उद्योग वाणिज्य संघका अध्यक्ष गयादीन कुर्मीले तौलिहवा क्षेत्रका उद्योगी व्यवसायीहरुलाई महायज्ञ प्रति अफनत्व ग्रहण गर्न आह्वान गरेका छन् ।
महायज्ञमा कपिलवस्तु जिल्लाको साथै छिमेकी राष्ट् भारतका सीमावर्ती गाउंहरुबाट पनि कथा श्रवण गर्न र पुजाआजा गर्न आउने अनुमान गरिएको आयोजक समितिका गणेश लाल कर्णले बताए ।
