रमेश मिश्रा । साझा न्यूज
कपिलवस्तु, ३१ चैत्र । साथीले बोकेको बन्दुक पड्केर शिकार खेल्न गएका अर्को साथीको मृत्यु भएको छ । प्रहरीका अनुसार मृत्यु हुनेमा बुद्धभुमी नगरपालिका वडा नं. ९ गब्दहवाका स्थानीय २८ को समुन्द्र गाहा मगर रहेका छन् । मृतक समुन्द्र गाहा मगर संगै सोही गाउंका ३४ वर्षीय राम बहादुर थारु र ३६ वर्षीय कालु भन्ने राम थारु मिलेर साथमै जंगली जनावरको सिकार खेल्न गाँउ देखि करीब ६ कि.मी. उत्तर तर्फ कपिलवस्तु अर्घखाँची सिमाना गब्दहवा देखि खैरभट्टी जाने सिमानामा रहेको बुद्ध यशोधरा सामुदायिक बनमा गएका थिए ।
शिकार खेल्न गएका उनीहरुले जंगल किनारमा गाडीको आवाज सुने पछि भागेर सुरक्षित स्थान तर्फ भागेका थिए । सोही क्रममा आफ्नै साथी राम थारुले बोकेको बंदुक पड्कदा सो वन्दुकको गोली लागेर समुन्द्र गाहा मगरको मृत्यु भएको प्रहरी ईलाका प्रहरी कार्यालय गोरुसिंगेका ईन्चार्ज प्रहरी निरिक्षक विर बहादुर सुनारले बताए ।
खुट्टामा गोली लागी अधिक रक्त श्राव भएका घाईते मगरको उपचारको क्रममा भैरहवा मेडिकल कलेजमा मृत्यु भएको जिल्ला प्रहरी कार्यालयले जनाएको छ । घटना लगत्तै इलाका प्रहरी कार्यालय गोरुसिडेबाट खटिएको प्रहरी टोलीले ३ जनालाई पक्राउ गरेको छ । पक्राउ पर्नेहरुमा मृतक संगै शिकार खेल्न गएका राम बहादुर थारु, कालु भन्ने राम थारु तथा हातहतियार लुकाउन सहयोग गर्ने प्रवेश थारु रहेका छन् ।
उक्त सिकार खेल्न प्रयोग भएका २ नाल भरुवा बन्दुकहरु बरामद गरिएको छ । जस मध्ये १ वटा फायर भएको अवस्थाको वन्दुक र अर्को लोडेड अवस्थामा लुकाई छाई राखेको अवस्थाको वन्दुक बरामद गरिएको छ ।
यो घटनामा संगै शिकार खेल्न गएका राम बहादुर थारु, कालु भन्ने राम थारु तथा हातहतियार लुकाउन सहयोग गर्ने प्रवेश थारुलाई आजै पक्राउ गरि बरामद दशी सहित इलाका प्रहरी कार्यालय गोरुसिङेमा ल्याई थप अनुसन्धान भईरहेको प्रहरी नायब उपरीक्षक मोहन मणि अधिकारीले बताए ।
