कपिलबस्तु, बैशाख २६ गते । अख्तियार दुरुपायोग अनुसंधान आयोगमा चालु आर्थिक बर्षको साउन देखि चैत महिना सम्म कपिलवस्तुका २ सय ८० उजुरी परेका छन । अख्तियार दुरुपायोग अनुसंधान आयोगको कार्यालय बुटवलद्वारा कपिलवस्तुको तौलिहवामा आयोजित भष्ट्राचार नियन्त्रण तथा सुशासन प्रबद्र्धन सम्बन्धी जिल्ला स्तरीय अन्तरक्रिया कार्यक्रममा सो तथ्यांक प्रस्तुत गरिएको हो ।
संघीय, प्रदेश र स्थानीय तह गरी सो उजुरी परेको हो । आयोगकी बुटवल स्थित कार्यालयकी प्रमुख बिनिता भट्टराईले आफ्नो कार्यक्षेत्रमा पर्ने लुम्बिनी प्रदेशका नौ जिल्लामा कुल १ हजार ४८ उजुरी परेको बताउनुभयो ।
सबै भन्दा बढी कपिलवस्तु नगरपालिकाका ६१, कृष्णनगरका ५९, बुद्धभुमि नगरपालिकाको, मायादेबी र यशोधरा गाउपालिकाका ३१÷३१, बाणगंगा नगरपालिका १७, शुद्धोधन १६, ,बिजयनगर १४, महाराजगंज नगरपालिका ११ र शिवराज नगरपालिकाका ९ उजुरी परेको छ ।
उजुरी परेका मध्ये १ सय ३० को बिस्तृत अनुसंधान प्रकृया अघि बढाइएको र त्यस मध्ये ७० वटाको अनुसंधान संपन्न गरिएको भट्टराईको भनाई छ ।
सो अवसरमा आयोगका आयुक्त किशोर कुमार सिलवालले अख्तियारमा उजुरी पर्ने बित्तिकै सबै सकियो भन्ने भ्रम हटाउनु पर्ने बताउनुभयो । उजुरीको क्रममा बोलाउनु भनेको सफाईका लागि मौका दिएको बुझ्नु पर्ने उहाँको भनाई छ । सधै उजुरीले नराम्रो गर्ने मात्र होईन केहीले राम्रो समेत गर्ने उहाँले बताउनुभयो ।
सो अवसरमा जिल्ला समन्वय समितिका प्रमुख बावुराम आचार्यले कपिलवस्तुमा आफैले सहमति गर्ने अनी उसैले अख्तियारमा उजुरी गर्नै प्रबृत्ति बढेको बताउनुभयो । उहाँले केहीले दुःख दिनैका लागि समेत उजुरी दिने गरेको बताउनुभयो । अख्तियारले समेत यस्ता प्रबृत्तिलाई निरुत्साहीत गर्नु पर्ने उहाँको भनाई छ ।
त्यस्तै कपिलबस्तु नगरपालिकाका नगर प्रमुख सुदीप पौडेलले आफ्नो पालिकामा अनावश्यक अख्तियारमा उजुरी परेकोले कर्मचारीको मनोबल खस्किएको बताउनुभयो । उहाँले अहिले सम्म दिएको उजुरीमा कोही पनि दोषी नदेखिएकाले समेत यो दुःख दिने नियतले नै गरिएको भन्ने प्रस्ट भएको बताउनुभयो । दुःख दिने नियतले गरिएको उजुरीका बिषयमा अख्तियारले ध्यान दिनु पर्ने उहाँको भनाई छ ।
सो अवसरमा प्रमुख जिल्ला अधिकारी दिल कुमार तामाङले पारदर्शी, जिम्मेवारी र बिधि अनुसार काम गर्नु पर्ने बताउनुभयो । ब्यक्ति केन्द्रित र आफुलाई नै साध्य मानेर काम गर्ने प्रबत्तिले गर्दा भ्रष्ट्रचार बढेको उहाँको दाबी छ । आफुले भ्रष्टाचार गरे पनि दुधको धोएको जस्तो देखिने र अरुलाई भष्ट्राचरी देख्ने चलन बढेकोले समते समस्या आउने गरेको उहाँको भनाई छ । उहाँले कानुनले निषेधित गरेका काम गर्न नहुने बताउनुभयो ।
कार्यक्रममा १४ जनाले बिभिन्न जिज्ञासा राखेका थिए । आयोगका सह सचिव रमेश कुमार केसीले जिज्ञासाका बिषयमा सुझाव दिएका थिए । कार्यक्रममा महराजगंज नगरपालिकाका नगर प्रमुख अब्दुल कलाम खाँ, बाणगंगा नगरपालिकाका नगर प्रमुख चक्रपाण्ी अर्याल, मायादेबी गाउपालिका अध्यक्ष वलीउद्दीन मुसलमान, विभिन्न कार्यालयका प्रमुख, राजनितिक दलका प्रमुख एवम् प्रतिनिधि लगायतको सहभागीता रहेको थियो ।
