साझा न्यूज । विजयनगर
विपन्न समुदायको आर्थिक तथा सामाजिक अवस्थामा सुधारमा ल्याउन जिल्लाको विजयनगर गाउंपालिकामा खाद्य सुरक्षामा सामुदायिक रुपान्तरणको लागि पैरवी कार्यक्रम संचालन भई रहेको छ । अंधेरी हिल्फेको सहयोगमा कालिका स्वावलम्वन सामाजिक केन्द्रले विजयनगर गाउंपालिकाका ७ वटाका ३५ वटा समूह मार्फत कार्यक्रम संचालनमा छ ।
समूहमा मधेशी, पहाडी, दलित, थारु, मुस्लिम लगायत सवै समुदायका व्यक्तिहरु गरी १ हजार ८१ घर धुरी समेटिएका छन् । कार्यक्रम अन्र्तगत हरेक समूहमा ग्याप सेसन अर्थात असल कृषि अभ्यासका कक्षाहरु संचालनमा छन् ।
असल कृषि अभ्यास कक्षाहरुका माध्यमबाट कृषकहरुले व्यवसायिक कृषि गर्ने प्रवृत्तिको विकास हुने अपेक्षा गरिएको कार्यक्रमकी संयोजक सृजना पौडेलले बताईन् । विस्तारै समुहका सदस्यहरुमा छलफल गर्ने बानीको विकास भएको छ, कार्यक्रम संयोजक पौडेलले भनिन्, “उनीहरुले आज भोलि कृषि सम्वन्धी नयां प्रविधिको बारेमा जानकारी लिएका छन् र एकीकृत शत्रु जीव व्यवस्थापनका माध्यमबाट जैविक कृषिमा जोड दिएका छन् ।”
समूदायलाई सहज सिचाई व्यवस्थापनका लागि डिप बोरिंङ्ग जडान, सिजन अनुसारको विउ विजन वितरण, ७ वटा समूहलाई मोटर डेलिभरी पाईप, थोपा सिचाईका लागि स्प्रिंगर वितरण लगायतका कामहरु भई रहेको कार्यक्रमका फोकल पर्सन अजय चौधरीले बताए ।
समूहमा आवद्ध कृषकहरुलाई कार्यक्रमबाट आधुनिक कृषि प्रणालीका तौर तरिकाहरुको बारेमा अभ्यस्त गराउने र उत्पादनमा बृद्धि गरी उनीहरुको आम्दानी बढाउने लगायतका क्रियाकलापहरु संचालन भई रहेका छन् ।
यसरी शुरु गरिएको यो कार्यक्रम समुदाय स्तरमा कृषकहरुको अवस्था सुधारका लागि निकै नै महत्वपूर्ण रहेको विजयनगर गाउंपालिकाका अध्यक्ष गोपाल थापाले बताए । पालिकाले यो कार्यक्रमलाई एकदमै नजिकबाट हेरिरहेको छ, अध्यक्ष थापाले भने, “हामीले पालिकाबाट यो कार्यक्रमलाई अझ अरु के सहयोग गर्नु पर्छ ? हामी सहयोग गर्न तत्पर छौं ।”
