साझा न्यूज । तौलिहवा
कपिलवस्तु नगरपालिकाका विभिन्न वडाहरुमा उपमेयर सम्वोधन कार्यक्रम धमाधम सम्पन्न हुदै छन् । चालु आर्थिक वर्ष मा उपमेयर सम्वोधन कार्यक्रम अन्र्तगत विभिन्न मठ मन्दिर तथा मस्जिद मदरसाहरुलाई सहयोग गरिएको छ ।
वडा नं. ९ कुस्मामा निर्माणाधीन दुर्गा मन्दिरलाई १ लाख ५० हजार रुपैया सहयोग गरिएको छ । सोही वडाको किर्तन मण्डलीलाई हारमुनियम खरिद लगायतमा ८० हजार रुपैया खर्च गरिएको छ ।
वडा नं. १२ कालिका मा.वि.बाल विकास केन्द्रलाई १ लाख रुपैया बराबरका सामाग्रीहरु खरिद सहयोग भएको उमेयर सुनिता गुप्ताले बताईन् । विपन्न समुदायका कहार समुदायलाई माछा व्यवसायबाट जीवन यापनमा सहयोग पुगोस् भन्दै उनीहरुलाई २ लाख रुपैयाको माछा मार्ने जाल वितरण गरिएको कपिलवस्तु नगरपालिका उपमेयर सचिवालयले जनाएको छ ।
महिलाहरुमा जीवन उपयोगी व्यवसायिक सीप बृद्धिका लागि ब्युटीपार्लर तालिम संचालन गर्नका लागि ३ लाख रुपैया बजेट प्रवाह गरिएको छ । यसबाट नगर क्षेत्रका थुप्रै महिला तथा युवतीहरुले सीप प्राप्त गरी जिविकोपार्जनमा सघाउ पुग्न सक्ने अपेक्षा गरिएको छ ।
वडा नं. १ र वडा नं. १० मा हैण्ड पाईप जडानका लागि १० लाख रुपैया विनियोजन गरिएको छ । वडा नं. ५ को दलदलाहामा ५ लाख रुपैया सडक पिसीसी कार्यमा खर्च गरिएको छ । यसै गरी कपिलवस्तु अस्पतालमा ५ थान कुलर र मन्दिरमा ठुलो कुलर वितरण गरिएको छ ।
यसै गरी वडा नं. ९ को जगदीशपुरमा लाईट र पोल सुन्दरीकरणका लागि १० लाख रुपैया खर्च गरिएको छ । विभिन्न संघ संस्थाहरुका लागि तालिम, संस्था व्यवस्थापन लगायतका शिर्षकहरुमा पनि उपमेयर सम्वोधन कार्यक्रमले समेटेको उपमेयर सुनिता गुप्ताले बताईन् ।
