लेखनाथ, साउन २१ गते । कास्कीको अन्नपूर्ण क्षेत्रमा पर्ने हाइक्याम्प भ्रमण गरी फर्किदा मोदी किनारमा अलपत्र तीन युवाको सकुशल उद्धार भएको छ ।
पोखरा–१४, खसीबजार बस्ने वर्ष २४ का अजित केसी, वर्ष २३ का युकेश गुरुङ, वर्ष २३ कै करण लामालाई स्काभेटरको सहायताले सशस्त्र प्रहरी बल र नेपाली सेनाको संयुक्त टोलीले बिहीबार बिहान सवा १० बजे उद्धार गरेको हो ।
कास्कीका सहायक प्रमुख जिल्ला अधिकारी चित्राङ्गत बरालले तीन जनालाई सकुशल उद्धार गरी पोखरा ल्याउन लागिएको जानकारी दिनुभयो । “उहाँहरुको उद्धार भएको छ, अब पोखरा ल्याएर स्वास्थ्य जाँच गरी परिवारको जिम्मा लगाउँछौँ,” बरालले भन्नुभयो । माछापुच्छ्रे गाउँपालिका वडा नम्बर ९ को मोदी नदी किनारमा तीन युवा मङ्गलबार रातिबाट अलपत्र पर्नुभएको थियो ।
अप्ठ्यारो भीरतलको खोला किनारमा अलपत्र पर्नुभएका उहाँहरुले मङ्गलबार र बुधबार राति नजिकैको ओडारमा बास बस्नु भएको थियो । अन्नपूर्ण गाउँपालिका वडा नम्बर ११, छोम्रोङको पारिपट्टि बादलडाँडाबाट सिधै फर्किने क्रममा बाटो भुल्दा उहाँहरु अलपत्र पर्नु भएको थियो । युवाहरु रहेको क्षेत्र पोखरा महानगरबाट ७० किलोमिटर उत्तरमा पर्छ ।
उद्धारका लागि बिहीबार बिहानैबाट टोली खटिएका थिए । नेपाली प्रहरीका दुई जना, सशस्त्र प्रहरीका नौ जना र नेपाली सेनाका छ जना गरी १७ जनाको टोली उद्धारमा खटिएको थियो ।
