प्रधानमन्त्री बालेन्द्र साहले ‘प्रधानमन्त्री दैवी उद्धार कोष’मा हालसम्म ७ अर्ब ८८ लाख ५७ हजार २१७ रुपैयाँ जम्मा भएको जानकारी दिएका छन्।
बुधबार बसेको प्रतिनिधिसभाको बैठकलाई सम्बोधन गर्दै प्रधानमन्त्री साहले विपद् व्यवस्थापनका लागि कोषको मौज्दात तथा निकासा सम्बन्धी विवरण सार्वजनिक गरेका हुन्।
उनका अनुसार सरकारले विपद् व्यवस्थापन तथा राहत कार्यलाई प्रभावकारी बनाउन राष्ट्रिय विपद् न्यूनीकरण तथा व्यवस्थापन प्राधिकरणका नाममा १ अर्ब रुपैयाँ निकासा गरिसकेको छ।
प्राधिकरणलाई उपलब्ध गराइएको उक्त रकममध्ये हालसम्म १५ वटा पालिकाका लागि ६ करोड ७५ लाख रुपैयाँ निकासा भइसकेको प्रधानमन्त्री साहले बताए। विपद् प्रभावित स्थानीय तहमा सिधै बजेट पठाएर राहत तथा पुनर्स्थापनाका कामलाई तीव्रता दिइएको उनको भनाइ छ।
प्रधानमन्त्री साहले विपद्को समयमा उपलब्ध स्रोत र साधनको अधिकतम उपयोग गर्दै नागरिकको जिउधनको सुरक्षा गर्न सरकार प्रतिबद्ध रहेको पनि बताए।
