जापान । प्रकृतिको विनाशकारी प्रहारले रसुवा, नुवाकोट र धादिङलगायत क्षेत्रका सयौँ परिवार पीडा र संकटमा परिरहेका बेला जापानबाट एक नेपाली व्यवसायीले मानवीयताको हात अघि बढाएका छन्।
जापानमा व्यवसाय गर्दै आएका नेपाली व्यवसायी टीका श्रेष्ठले रसुवाको भोटेकोशी क्षेत्रमा गत बुधबार आएको विनाशकारी बाढीबाट प्रभावित नागरिकको उद्धार, राहत तथा पुनःस्थापनाका लागि २१ लाख रुपैयाँ सहयोग गरेका छन्।
दोलखाको बैतेश्वर गाउँपालिका स्थायी घर भएका श्रेष्ठ नेतृत्वको पूर्ण ट्रेडिङ जापानले सोमबार, ३१ अगस्ट २०२६ मा प्रधानमन्त्री दैवी प्रकोप उद्धार कोषमा उक्त रकम जम्मा गरेको हो।
पूर्ण ट्रेडिङ जापानका कार्यकारी प्रमुख श्रेष्ठका अनुसार नेपाल सरकारले गरेको सहयोग आह्वानप्रति ऐक्यबद्धता जनाउँदै बाढी तथा पहिरोपीडितको घाउमा थोरै भए पनि मल्हम लगाउने उद्देश्यले उक्त सहयोग प्रदान गरिएको हो।
रसुवा, नुवाकोट, धादिङलगायत क्षेत्रमा आएको बाढीपहिरोले निम्त्याएको जनधनको क्षति र पीडित परिवारको कारुणिक अवस्था देखेपछि आफू मौन दर्शक बनेर बस्न नसकेको श्रेष्ठले बताए।
‘बाढीले दिएको पीडा र त्यहाँका नागरिकको अवस्था देखेर चुपचाप बस्न सकिएन,’ श्रेष्ठले भने, ‘हामीले फेरि कमाउन सक्छौँ, गुमाएको सम्पत्ति पनि समयसँगै जोड्न सकिन्छ, तर यस्तो विपत्तिले मानिसको जीवनमा फेरि कहिल्यै यति ठूलो घाउ नदियोस् भन्ने हाम्रो कामना हो।’
उनको यो भनाइमा सहयोगभन्दा पनि विपत्तिको घडीमा एक नेपालीले अर्को नेपालीप्रति देखाउनुपर्ने मानवीय दायित्व झल्किन्छ।
विगत १३ वर्षदेखि जापानमा नेपाली उत्पादनलाई त्यहाँको बजारसम्म पुर्याउँदै आएको पूर्ण ट्रेडिङ जापानले व्यवसायसँगै सामाजिक उत्तरदायित्वलाई पनि निरन्तर आत्मसात् गर्दै आएको जनाएको छ।
विदेशी भूमिमा पसिना बगाएर आर्जित आम्दानीको एक हिस्सा मातृभूमिमा परेको विपत्तिको घडीमा समर्पण गर्दै श्रेष्ठले देखाएको सहयोगले सीमा र दूरीभन्दा माथि उठेको नेपाली मनको सम्बन्धलाई फेरि एकपटक उजागर गरेको छ।
विपत्तिले थिलथिलो बनेका परिवारका लागि राहत र पुनःस्थापनाको आवश्यकता झनै बढिरहेका बेला जापानबाट आएको यो सहयोग रकम मात्र नभई पीडामा साथ दिने मानवीय संवेदनाको एउटा सशक्त उदाहरण बनेको छ।
