कपिलवस्तु, असोज २७ गते । सशस्त्र प्रहरीले कपिलवस्तुका विभिन्न स्थानबाट १० लाख ७४ हजार २० रुपैयाँ बराबरका अवैध सामान तथा सामान ढुवानीमा प्रयोग गरिएको मोटरसाइकल बरामद गरेको छ ।
सशस्त्र प्रहरी बल नेपाल नं. २८ गण हेडक्वार्टर कपिलवस्तु तथा मातहतका इकाईबाट खटिएको टोलीले लत्ताकपडा, किराना सामान, मोबाइल तथा मोटरपार्ट्सलगायतका सामग्री बरामद गरेको हो ।
सशस्त्र प्रहरीका अनुसार बरामद गरिएका सामान र ढुवानीमा प्रयोग गरिएको एक थान मोटरसाइकलको कुल मूल्य १० लाख ७४ हजार २० रुपैयाँ कायम गरिएको छ ।
बरामद सामान तथा मोटरसाइकल आवश्यक कारबाहीका लागि सम्बन्धित भन्सार कार्यालयमा बुझाइएको सशस्त्र प्रहरीले जनाएको छ ।
सशस्त्र प्रहरी उपरीक्षक गोपाल अधिकारीले सीमा क्षेत्रमा हुने अवैध ओसारपसार तथा भन्सार छली नियन्त्रणका लागि निगरानी बढाइएको बताउनुभयो । चाडपर्वका समयमा हुन सक्ने राजस्व छली र अवैध गतिविधि नियन्त्रण गर्न मातहतका इकाईलाई सक्रिय बनाइएको उहाँले जानकारी दिनुभयो ।
