कपिलवस्तु, कात्तिक १ गते । कपिलवस्तुको महाराजगञ्ज नगरपालिका–८ स्थित सिंगरहा गाउँमा स्थानीयवासी र प्रहरीको सहभागितामा सरसफाइ अभियान सञ्चालन गरिएको छ । गाउँका नालीमा माटो जमेर पानीको निकासमा समस्या हुनुका साथै सडकमा फोहोर बढेपछि अभियान सञ्चालन गरिएको हो ।
महाराजगञ्ज नगरपालिका–८ का वडाध्यक्ष पदका उम्मेदवार राकेशकुमार ठाकुरको संयोजकत्वमा सञ्चालित अभियानमा स्थानीयवासी र इलाका प्रहरी कार्यालय हरदौनाका प्रहरी सहभागी भएका थिए ।
ठाकुरका अनुसार गाउँको सरसफाइ सुधार गर्ने उद्देश्यले अभियान सञ्चालन गरिएको हो । उहाँले वडाका अन्य टोलमा समेत सरसफाइ अभियानलाई निरन्तरता दिने बताउनुभयो ।
‘स्वच्छ वडा, स्वस्थ नागरिक, समृद्ध समाज—हाम्रो वडा, हाम्रो जिम्मेवारी’ भन्ने नारासहित सञ्चालित अभियानमा उहाँले सरसफाइलाई सबैले साझा जिम्मेवारीका रूपमा लिनुपर्नेमा जोड दिनुभयो ।
ठाकुरले स्थानीय नागरिकलाई राष्ट्रिय परिचयपत्र बनाउन, नागरिकतासम्बन्धी काम गर्न तथा अन्य आवश्यक सेवा प्राप्त गर्न सहजीकरण गर्दै आएको बताउनुभयो । शिक्षा, स्वास्थ्य र खानेपानीलगायतका क्षेत्रमा सुधारका लागि पहल गर्ने प्रतिबद्धता व्यक्त गर्दै उहाँले किसानलाई समयमै मलखाद उपलब्ध गराउन र सिँचाइको व्यवस्था गर्नसमेत पहल गर्ने बताउनुभयो ।
यसैबीच, वडाका विभिन्न बस्ती बाणगङ्गा नदीको कटानबाट प्रभावित हुँदै आएको उल्लेख गर्दै ठाकुरले सिंगरहा, हरदौना र करैलियालगायतका बस्तीलाई कटानबाट जोगाउन सम्बन्धित निकायसँग पहल गर्ने बताउनुभयो ।
नदी कटानका कारण स्थानीयवासीले भोग्दै आएका समस्या समाधानका लागि आवश्यक नियन्त्रण तथा संरक्षणका काम अघि बढाउनुपर्ने उहाँको भनाइ छ । उहाँले स्थानीयका समस्या समाधानका लागि निरन्तर लाग्ने प्रतिबद्धतासमेत व्यक्त गर्नुभयो ।
