कपिलवस्तुको चन्द्रौटामा यसवर्ष दशैँको टीकाको तेस्रो दिन हिजो शनिबार निक्कै सद्भावपूर्ण कार्यक्रम भएको छ ।
दशैँमा हुने सराय नाचको अवसरमा कपिलवस्तुको शिवराज नगरपालिका–५ चन्द्रौटामा मुस्लिम समुदायका युवाहरुले समेत समन्वय र सहभागीता जनाएपछि विशेष सद्भावयुक्त कार्यक्रम भयो ।
मेलामा सहभागीलाई उनीहरुले मिठाई र पानी वितरण गरे । त्रयोदशीमा गरिएको सराय नाचमा स्थानिय मुस्लिम समुदायबाट सहयोग भएसँगै धार्मिक सहिष्णुता, आपसी भाइचारा र सामाजिक सद्भावको सन्देश फैलिएको स्थानिय अगुवाको प्रतिक्रिया छ । धार्मिक, सांस्कृतिक तथा सामाजिक सद्भावको सन्देश फैलाउँदै सराय जात्रा भएको हो ।
विगत १९ वर्षदेखि निरन्तर रूपमा आयोजना हुँदै आएको सराय जात्रा पछिल्लो समय चन्द्रौटाको पहिचान र सांस्कृतिक सम्पदाका रूपमा स्थापित हुँदै गएको छ । २०६४ सालमा चन्द्रौटामा भएको हिंसात्मक घटनापछि आपसी सद्भाव, भाइचारा र सामाजिक एकता कायम गर्ने उद्देश्यले शुरु गरिएको सराय जात्राले अहिले धार्मिक उत्सवका साथै सामाजिक मेलमिलापको सन्देशसमेत दिँदै आएको छ ।
यसवर्ष पनि पञ्चेबाजा बजाउँदै, तरबार र खुँडा नचाएर सहभागीले उत्साहपूर्वक सराय नाच प्रदर्शन गरेका छन् । सहभागी ‘वाखै हो’ भन्दै नाचमा रमाए । शिवराज नगरपालिका–५ कणेश्वरी मन्दिरबाट शुरु भएको सराय जात्रा चन्द्रौटा बजार परिक्रमा गर्दै दुर्गा मन्दिरमा पुगेर समापन गरिएको थियो ।
जात्रामा स्थानीयवासीन्दासहित विभिन्न क्षेत्रबाट आएका सर्वसाधारणको सहभागिता रहेको थियो । जात्रामा सहभागीलाई चन्द्रौटा चोकमा मुस्लिम समाज शिवराजले निःशुल्क खानेपानी र मिठाइ वितरण गरेको थियो । दुर्गा मन्दिर व्यवस्थापन समितिका अध्यक्ष कमला पाण्डेले सराय जात्रा संस्कृति संरक्षण, प्रवद्र्धन र धार्मिक सद्भावको प्रतीक भएको बताउनुभएको छ ।
पछिल्लो समय अर्घाखाँची, गुल्मीलगायतका जिल्लाबाट बसाइँसराइ गरी चन्द्रौटा क्षेत्रमा पुगेका परिवारहरूले पनि सराय जात्रालाई उत्सवका रूपमा मनाउँदै आएका छन् ।
