सशस्त्र प्रहरीले कपिलवस्तुको विजयनगर गाउँपालिका वडा नम्बर १ ज्वाबैराठ जंगलमा अवैध रुपमा भित्राइएका ४ भारतीय नम्बर प्लेटका मोटरसाइकल सहित १८ लाख बराबरको सामाग्री बरामद गरेको छ।
सशस्त्र प्रहरी बल प्रस्तावित सीमा सुरक्षा गुल्म कृष्ण नगरको गस्ती टोलीले बिकट क्षेत्रमा पर्ने जवाबैराठबाट सोमबार राति सो सामाग्री बरामद गरेको हो।
भन्सार छली नेपाल ल्याइएको १८ लाख मूल्य बराबरको अवैध सामान सशस्त्र प्रहरी बलले नियन्त्रणमा लिएको हो। चार वटा भारतीय नम्बर प्लेटका मोटरसाइकलमा ल्याइएको अवैध सामान जंगलमा लुकाई छिपाई राखेको अवस्थामा बरामद गरेको सशस्त्र प्रहरी उपरीक्षक जीवन केसीले बताए।
बरामद गरिएका सामानहरुमा कपडा र चप्पलहरु गरी १६ पोका रहेका छन्। सबै गरी १८ लाख बढीको सामाग्री बरामद गरिएको केसीले बताए। नियन्त्रणमा लिइएका मध्ये एउटा पल्सर र तीन वटा स्प्लेन्डर रहेका छन्। बरामद गरिएको सामान कृष्ण नगर भन्सार कार्यालयमा बुझाइएको छ।
सशस्त्र प्रहरी बल नेपाल २८ नम्बर गण कपिलवस्तुका गणपति जीवन केसीले सशस्त्र प्रहरीले सिमामा हुने चोरी तस्करी नियन्त्रणका लागि गस्ती बढाइएको बताए।
