विश्व पर्यटन दिवसमा सुनसान कपिलबस्तुका बुद्ध स्थल

तौलिहवा, असोज ११ गते । विश्वभर विभिन्न कार्यक्रम गरि बुधबार ४४ औ विश्व पर्यटन दिवस मनाईरहदा कपिलबस्तुको तिलौराकोट सहित गोटिहवा, निग्लिहवा, कुदान अरौराकोट, सिसहनिया, सगरहवा लगायतका बुद्ध स्थल सुनसान बनेका थिए । लुम्बिनी विकास कोषले बुद्धजन्म स्थल लुम्बिनीमा विभिन्न औपचरिक कार्यक्रम गरि मनाए पनि कपिलबस्तु स्थित बुद्ध स्थल सुनसान जस्तै बनेका हुन् ।
बुद्धले आफ्नो जीवनको २९ वर्ष विताएको ठाँउ तिलौराकोटमा कोषले कुनै पनि गतिविधि नहुनु पर्यटन प्रवद्र्धनमा चिन्ताको विषय बनेको छ । तिलौराकोट क्षेत्रमा न स्थानीय सरकारले काम ग¥यो न त लुम्बिनी विकास कोषले नै कुनै कार्यक्रम ग¥यो । यो क्षेत्र बुद्धबार सुनसान जस्तै भयो ।
स्थानिय राजकुमार यादवका अनुसार तिलौराकोट महात्वपूर्ण सम्पदा भएपनि विश्व पर्यटन दिवसमा सुनसान रहेको बताउनुभयो । यस क्षेत्रमा पर्यटनलाई बढवा दिन स्थानियको सहभागितमा लुम्बिनी विकास कोष र पुरातत्व विभागले विभिन्न किसिमका कार्यक्रमहरु आयोजना गर्नु पर्ने उहाँको भनाई छ ।
लुम्बिनी विकास कोष तिलौराकोट शाखाका प्रमुख माधव प्रसाद आचार्यका अनुसार ४४ औ विश्व पर्यटन दिवसमा प्राचीन शाक्य राज्यको राजधानी तिलौराकोटमा कुनै पनि औपचरिक अनौपचरिक कार्यक्रमहरु अयोजना नगरिएको बताउनुभयो । उहाँले भन्नुभयो ‘पुर्व तयारीको अभावमा तिलौराकोट क्षेत्रमा कुनै पनि कार्यक्रम नगरिएको हो ।’ लुम्बिनी विकास कोषको प्रधान कार्यालयले लुम्बिनीमा प्रथम पटक लुम्बिनीमा प्रबेश गर्ने पर्यटकको स्वागत सहित विभिन्न औपचरिक कार्यक्रम गरि मनाएको उहाँले बताउनुभयो ।
गत आर्थिक बर्ष तिलौराकोटमा स्वादेशी विदेशी गरी १ लाख ४ हजार १४६ जना पर्यटकहरु भ्रमण गरेको तथ्यांक छ । तिलौराकोटमा खासगरी छिमेकी राष्ट्र भारत, थाई, म्यानमार, बर्मा, कोरीयन, चीन र मलेसिया लगायतको देशबाट पर्यटकहरु आउने गरेका छन् ।