कपिलबस्तु, फागनु ४ गते । कपिलबस्तुमा राष्ट्रिय प्रजातन्त्र दिवस विभिन्न कार्यक्रम गरी मनाइने निर्णय गरिएको छ । दिवस मनाउनका लागि जिल्लाका सबै सरकारी कार्यालय स्थानीय तह लगायत सरोकारवालाहरुले आपसी समन्वयमा कार्यक्रम संचालन गरी भव्यताका साथ मनाउने निर्णय गरिएको हो ।
जिल्लामा उक्त दिवसलाई फाल्गुण ६,७ र ८ गते तीन दिनसम्म जिल्लास्थित सबै सरकारी निकाय, प्रतिष्ठान तथा संघ–संस्थाका कार्यालयहरुको छत बरण्डा र परिसरमा निर्धारित साइजका राष्ट्रिय झण्डा मर्यादापूर्वक राखी सजाउने र साँझ सम्पूर्ण कार्यालयहरुमा र जिल्लावासीहरुको घरघरमा समेत दीप प्रज्ज्वलन गर्ने निर्णय गरिएको छ ।
सामाजिक विकास डिभिजन कार्यालयको सहयोगमा बुधबार(६ गते) तौलेश्वरनाथ संस्कृत मा.वि.का फरक क्षमता भएका विद्यार्थीहरुका लागि शैक्षिक तथा अन्य सामाग्रि वितरण गर्ने निर्णय छ ।
सो अवसरमा मंगलबार (६गते) दिन बिहान ८.०० बजेदेखि खानेपानि तथा सरसफाई डिभिजन कार्यालयको व्यवस्थापनमा जिल्लामा रहेका सार्वजनिक, सांस्कृतिक र पुरातात्विक स्थान (तिलौराकोट) हरुको सरसफाई गर्ने, बुधबार (७ गते) प्रभातफेरी (बजार परिक्रमा) कार्यक्रमपश्चात् कर्मचारी मिलन केन्द्र कपिलवस्तुले कपिलवस्तु जिल्ला अस्पतालका बिरामिहरुका लागि फलफूल वितरण गर्ने निर्णय गरिएको जिल्ला समन्वय समितिका प्रमुख बाबुराम आचार्यले बताउनुभयो ।
त्यस्तै कपिलवस्तु नगरपालिकाको व्यवस्थापनमा नेपाल रेडक्रस सोसाईटिको प्राविधिक सहयोगमा कपिलवस्तु अस्पतालमा रक्तदान कार्यक्रम सञ्चालन गर्ने उहाँको भनाई छ ।
सो अवसरमा प्रमुख जिल्ला अधिकारी विश्व प्रकाश अर्याल, कपिलबस्तु नगरपालिकाका प्रमुख प्रशासकिय अधिकृत पुनाराम पौडेल, सुरक्षा निकायका प्रमुख, विभिन्न सरकारी तथा गैर सरकारी संस्थाहरुको प्रमुख एव्म प्रतिनिधिहरुको सहभागिता रहेको थियो ।
कपिलबस्तुमा विभिन्न कार्यक्रम गरी प्रजातन्त्र दिवस मनाईने
