साझा न्यूज । कपिलवस्तु
प्रजातन्त्र दिवसको अवसर पारेर बहिरा बालबालिकाहरुलाई स्कुल व्याग वितरण गरिएको छ । जिल्ला समन्वय समितिको आयोजना र सामाजिक विकास डिभिजन कार्यालयको आर्थिक समन्वयमा श्री तौलेश्वरनाथ संस्कृत माध्यमिक विद्यालयमा अध्ययनरत २७ जना विद्यार्थीहरुलाई सो व्याग वितरण गरिएको हो ।
जिल्ला समन्वय समितिका प्रमुख बाबुराम आचार्य, उपप्रमुख रमेश कुर्मी, प्रमुख जिल्ला अधिकारी विश्व प्रकाश अर्याल, जिल्ला समन्वय अधिकारी जर्नादन अधिकारी, शाखा अधिकृत पुनम जि.सी., ईन्जिनियर आरती भट्ट, सामाजिक विकास डिभिजन कार्यालयका प्रमुख राम कुमार पाल र अधिकृत तिलकराम पौडेलले सामुहिक रुपमा विद्यार्थीहरुलाई व्याग वितरण गरेका थिए ।
सो अवसरमा समन्वय प्रमुख आचार्यले बोल्न र सुन्न नसक्ने भएकै कारण यी बालबालिकाहरुमा कुनै पनि किसिमको भेदभाव हुन नहुने बताए । उनीहरुको ज्ञान, सीप, क्षमता विकासका लागि हरेक स्थानीय तहले विशेष ध्यान दिन समन्वय प्रमुख आचार्यले आग्रह समेत गरेका छन् ।
सो अवसरमा विद्यालयका प्रधानाध्याक पुजारी प्रसाद चौधरी, सहायक प्रधानाध्यापक प्रदीप कुमार ओझा, कपिलवस्तु बहिरा संघका जिल्ला अध्यक्ष रिंकु अग्रहरी लगायतको उपस्थिति रहेको थियो । यसरी सहयाेग पाए संगै बहिरा विद्यार्थीहरू निकै उत्साहित बनेकाे विद्यालयका प्रधानाध्यापक पुजारी प्रसाद चाैधरीले बताए ।
