विद्यालय शिक्षा ऐन शीघ्र जारी गर्न माग गर्दै ज्ञापनपत्र

तौलिहवा(कपिलबस्तु), फागुन ९ गते । विद्यालय शिक्षा ऐन शीघ्र जारी गर्न माग गर्दै नेपाल शिक्षक महासंघ चरणबद्ध आन्दोलन सुरु गरेको छ । महासंघले २०७५, २०७८ र २०८० मा सरकारसंग भएको सहमति कार्यान्वायन नभएको भन्दै आफ्ना विभिन्न माग सहितको ज्ञापन पत्र शिक्षा विकास तथा समन्वय इकाई कपिलबस्तुमा बुझाएको हो ।
मुलुकमा संघीय शासन व्यवास्था लागू भएको एक दशक वित्न लाग्दा समेत नयाँ शिक्षा ऐन आउन नसक्नु दुःखद भएको शिक्षकहरू बताउनु हुन्छ ।
नेपाल शिक्षक महासंघ कपिलबस्तुका अध्यक्ष गोविन्द पोखरेलले विगतमा शिक्षकहरूको आन्दोलनपछि सरकारसँग भएका सहमति अझै सम्म सम्बोधन नभएका कारण शिक्षकहरूका माग समेटेर तत्कालै शिक्षा ऐन जारी गर्न दबाब दिने उद्देश्यले ईकाई ज्ञापन पत्र बुझाएको बताउनुभयो । अहिले पनि २०२८ सालमा जारी भएकै ऐन कार्यान्वयनमा रहेका कारण विद्यालय शिक्षामा देखिएका समस्याहरू समाधान हुन नसकेको उहाँले स्पष्ट पार्नु भएको छ ।
उहाँले भन्नुभयो, ‘मुलुक तीन तहको संघीय संरचनामा गइसक्दा समेत पुरानै ऐनबाट काम गर्नुपर्दा विद्यालय शिक्षामा धेरै समस्याहरू देखिएका छन् ।’ नयाँ ऐन जारी गर्न सरकारसँग बारम्बार माग गरे पनि कुनै सुनुवाई नभएपछि शिक्षकहरू आन्दोलित हुनु परेको उहाँको भनाई छ ।
महासंघका अनुसार स्थायी, राहत, शिक्षण–शिकाई अनुदान, अस्थायी, करार, प्राविधिक शिक्षा, विशेष शिक्षा, तथा संस्थागत विद्यालयका शिक्षक र विद्यालय कर्मचारीहरूको पेशागत माग सम्बोधन हुनुपर्नेमा सरकार अलमलमा परेको छ । साथै विद्यालय शिक्षा ऐन संसदीय प्रक्रियामा रहेको बेला सरकारले निवृत्तिभरण सम्बन्धी अध्यादेश ल्याएर शिक्षकको भावना विपरीत कदम चालेको महासंघको आरोप छ ।
महासंघका पदाधिकारीहरूले शिक्षक, विद्यालय कर्मचारीको तलबमान सुधार, ग्रेड मिलान, शिक्षक अस्पताल, शिक्षकको मर्यादाक्रम, तथा शिक्षक–मैत्री विद्यालय शिक्षा ऐन जारी गरिनुपर्ने माग अघि सारेको छ । उनीहरूले माग सम्बोधन नभए अवरोधात्मक आन्दोलन, बहिष्कार र काठमाडौं केन्द्रित सडक प्रदर्शन गर्ने चेतावनी समेत दिएका छन् ।
ज्ञापनपत्र बुझ्दै शिक्षा विकास तथा समन्वय इकाई कपिलबस्तुका प्रमुख लोकनाथ मरासिनिले सबैको माग सम्बोधन हुने गरी शिक्षा ऐन आउन जरुरी रहेको बताउनुभयो । महासंघले बुझाएको माग पत्रलाई जस्ताको त्यस्तै शिक्षा मन्त्रालयमा बुझाउने उहाँले बताउनुभयो ।
सो अवसरमा नेपाल शिक्षक महासंघका पदाधिकारी, विभिन्न स्थानिय तहका शिक्षक संघ, विभिन्न विद्यालयका प्रधानाध्यापक लगायतको सहभागिता रहेको थियो ।