काठमाडौँ । त्रिभुवन अन्तर्राष्ट्रिय विमानस्थलबाट करिब ३.७४५ किलो (पौने ४ किलो) सुनसहित चार जना विदेशी नागरिक पक्राउ परेका छन्। पक्राउ पर्नेमा तीन महिला र एक पुरुष छन्, जो सबै उज्बेकिस्तानका नागरिक भएको खुल्न आएको छ।
विमानस्थल प्रशासन स्रोतका अनुसार, उनीहरू फ्लाई दुबईको एफजेएड ५७५ उडानबाट काठमाडौँ आएका थिए। विमानस्थलको टर्मिनल गेटमा शंका लागेपछि सुरक्षा जाँच गर्दा उनीहरूको साथबाट सुन बरामद गरिएको हो। पक्राउ परेकाहरूको परिचय उज्बेकिस्तानका नागरिक अखमदजनोभ्ना डिल्फुजा मारिफालिभ, इस्राइलोभ्ना साओदत फैजिवा, गुलामजनोभ्ना उमिदा अखमेदोभ र सरदार तुर्सुनोभ रहेका छन्। तुर्सुनोभ बाहेक अन्य सबै महिला हुन्।
पक्राउ परेकाहरूलाई थप अनुसन्धानका लागि आवश्यक कानुनी प्रक्रिया अघि बढाइएको र उनीहरूले कसरी सुन तस्करी गर्न खोजेका थिए र यसको पछाडि संलग्न अन्य व्यक्तिहरूको खोजी भइरहेको प्रहरी अधिकारीहरुले जनाएका छन् ।
