साझा न्यूज । यशोधरा (कपिलवस्तु)
जिविकोपार्जनका लागि भारतको मुम्बई शहर जान लागेका २ युवाले सीपमूलक तालिम पाए पछि गाउंमै स्वरोजगार भएका छन् । यशोधरा गाउंपालिका वडा नं. ३ वसन्तपुरका हरिराम पासी र बलिराम पासीले ईलेक्टिेनिक तालिम पाए पछि उनीहरुलाई रोजगारीको लागि मुम्बई शहर जानु पर्ने बाध्यता हटेको हो ।
यशोधरा गाउँपालिका वडा नम्बर ३ मा सञ्चालित सुधारिएको खाद्य प्रणाली परियोजनाबाट हरिराम पासी र वलिराम पासी लगायत २० जना भूमिहिन बेरोजगार युवालाई ४५ दिने ईलेक्ट्रोनिक तालिम प्रदा नगरिएको थियो ।
जस मध्ये तत्कालै यी दुई युवाले सो तालिमलाई आफ्नो दैनिकीमा परिणत गरी स्वरोजगार बन्न सफल भएका छन् । सीप सिके पछि उनीहरुले घरमै बसेर मोटर, फ्रिज, कुलर लगायतका ईलेक्ट्कि तथा ईलेक्टोनिक्स सामानहरुको मर्मत गरी मासिक ३० हजार देखि ५० हजार रुपैया सम्म कमाउन सफल भएका छन् ।
उनीहरुले परियोजना द्धारा सञ्चालित ४५ दिने तालिम लिएका थिए । तालिम सकिए पछि दुवै जनाले २५, २५ हजार बराबरको सामाग्री पाएर बसन्तपुरमा एउटा घुम्ती पसल राखेर व्यवसाय शुरु गरेका छन् । अहिले दुवै जनाले परियोजनाले दिएको ५० हजारको सामाग्री सगै आफ्नो लगानीमा टंकी पसल राखेका छन् ।
परिवार सँगै बसेर घरको खेतीबारी स्याहारेर आय आर्जन गर्न पाउदाँ आफुहरु निकै खुशी रहेको बलिराम पासीले बताए । जग्गा जमिन नभएका कारण परिवार पाल्न भारतका विभिन्न शहरमा रोजगारीका लागि जानुको आफुहरु संग विकल्प थिएन, बलिरामले भने, “यो तालिम हाम्रो लागि बरदान नै भएर आयो । अहिले हामी परिवारसंगै बसेर हांसी खुशी दिन विताउंदै छौं ।”
सीप सिके पछि परिवारमै बसेर आयआर्जन गर्न सकेकोमा उनीहरुमा आत्म बिश्वास समेत बढेको छ । आगामी सिजनमा सेवा विस्तार गरी आफ्नो आम्दानी बढाउने र सो आम्दानीबाट सामाग्री बृद्धि गरेर मासिक ५० हजार बचत गर्ने उनीहरुको योजना छ ।
