साझा न्यूज । कपिलवस्तु
छात्रछात्राहरुमा स्वच्छता र सरसफाई अभियानलाई प्रवर्धन गर्न भारत नयां दिल्ली स्थित सुलभ स्यानिटेशन क्लब र कालिका स्वावलम्वन सामाजिक केन्द्रको आयोजनामा तौलिहवा र लुम्विनीमा कार्यक्रम सम्पन्न गरिएको छ ।
तौलिहवा स्थित श्री तौलेश्वरनाथ संस्कृत मा.वि. र बुद्धपद्म मा.वि.का विद्यार्थीहरुका विच शुलभ स्यानिटेशन क्लबका अभियन्ताहरुले बिद्यालय र समुदायमा दिगो जल, सरसफाई र स्वच्छता अभ्यासलाई तीव्र गतिमा प्रबद्र्धन विषयमा अभिमुखीकरण गरेका थिए ।
विद्यार्थी, शिक्षक र अभियन्ताहरुले तौलिहवा बजार परिक्रमा गरी महिनावारी सम्वन्धी समाजमा विद्यमान नकारात्मक धारणाको विरुद्ध सन्देशमूलक नाराहरु उद्घोष गरेका थिए ।
बजार परिक्रमा पछि विद्यार्थी र शिक्षकहरु विच सुलभ क्लबका अयिभन्ताहरुले ग्रामीण र शहरी सरसफाई प्रविधी उपयोगका बारेमा कार्यशाला सम्पन्न गरेका छन् । यसै गरी दोस्रो दिन लुम्विनीको महिलाबार स्थित मधुवनी मा.वि.का छात्रछात्राका लागि पनि सो कार्यशाला आयोजना गरिएको थियो ।
सो अवसरमा सुलभ इन्टरनेशनलका राष्ट्रिय संयोजक रुपक रोय चौधरीले विद्यालय स्तरबाटै स्वच्छता अभियानका लागि हातेमालो अगाडि बढाउनु पर्ने बताए । लुम्बिनी प्रदेशको चार वटा विद्यालयबाट महिनावारी स्वच्छता, खानेपानी, सरसफाई र स्वच्छताका नमुना अभ्यास प्रस्तुत गर्ने गरी सचेतना प्रवाहको कार्यमा लागेको उनले जनाए ।
विद्यालय र समुदायहरुमा दिगो वास अभ्यासहरूको महत्वबारे चेतना अभिवृद्धि गर्न, सफल सरसफाई मोडेलहरू र स्थानीय नवप्रवर्तनहरु साझेदारी गर्नु कार्यक्रमको प्रमुख उद्देश्य रहेको कालिका स्वावलम्वन सामाजिक केन्द्रका कार्यकारी निर्देशक रामेन्द्र सिंह रावलले बताए । स्थानीय सरकार र समुदायको सक्रिय सहभागिता र स्वामित्वलाई प्रोत्साहन गर्न कार्यक्रमले सघाउने अपेक्षा गरिएको कालिका स्वावलम्वन सामाजिक केन्द्रका अध्यक्ष मन्दिप सिंहले बताए ।
यसै क्रममा “स्वच्छ भविष्यको निर्माण” भन्ने मूल नाराका साथ लुम्बिनीमा दिगो स्वच्छता अभ्यासहरुका लागि विशेष सरोकारवालाको सम्मेलन लुम्बिनी साँस्कृतिक नगरपालिकाको हलमा सम्पन्न भएको छ ।
बिद्यालय र समुदायमा दिगो जल, सरसफाई र स्वच्छता अभ्यासलाई तीव्र गतिमा प्रबद्र्धन गर्ने उद्धेश्यले शुलभ स्यानिटेसन क्लब र कालिका स्वावलम्बन सामाजिक केन्द्रको संयुक्त आयोजना तथा भारतीय दूतावासको बीपी कोईराला भारत–नेपाल प्रतिष्ठानको आर्थिक सहयोगमा सम्मेलन सम्पन्न गरिएको हो ।
सम्मेलनमा नेपाल स्थित भारतीय दुतावासका प्रथम सचिव बशिष्ठ नन्दनले स्वच्छता र सरसफाईका लागि सरोकारवाला सबै पक्षको समान दायित्व रहने बताए । उनले स्वच्छ नेपाल बनाउने अभियानमा जुट्न सबैलाई आग्रह गर्दै आफुहरु पनि स्वच्छ नेपाल अभियानमा सहकार्य गर्न तत्पर रहेको बताए । कार्यक्रममा ६० बढी सरसफाई अभियन्ताको सहभागिता रहेको थियो ।
