घाइते भेट्दै सांसद थापाद्वारा निष्पक्ष छानबिनको माग

कपिलबस्तु, चैत्र ८ गते । जिल्लाको महाराजगन्ज नगरपालिकामा शनिबार भएको घटनामा घाइते भएकालाई कपिलबस्तु क्षेत्र नं. २ का प्रतिनिधि सभा सदस्य विक्रम सिंह थापाले भैरहवास्थित मेडिकल कलेजमा भेटेर स्वास्थ्य अवस्थाबारे जानकारी लिनुभएको छ ।
घाइतेहरू पीडा र त्रासका बीच पनि धैर्यताका साथ उपचाररत रहेको उल्लेख गर्दै सांसद थापाले उहाँहरूको शीघ्र स्वास्थ्यलाभको कामना गर्नुभएको छ । साथै उपचार र आवश्यक सहयोगमा कुनै कमी हुन नदिन सम्बन्धित प्रशासन र सरोकारवालालाई गम्भीर ध्यान दिन उहाँले आग्रह समेत गरिसकेको बताउनुभयो ।
घाइतेलाई प्रत्यक्ष भेट्दा शान्ति व्यवस्था कायम गर्ने क्रममा प्रयोग गरिएको बल आवश्यकताभन्दा बढी भएको देखिएको भन्दै उहाँले यस विषयमा तथ्यपरक र निष्पक्ष अनुसन्धान हुनुपर्ने धारणा व्यक्त गर्नुभयो । परिस्थितिको उचित मूल्याङ्कन गर्दै शान्ति कायम गर्ने दायित्वसँगै नागरिकको सुरक्षा, अधिकार र मानवीय संवेदनशीलतालाई पनि प्राथमिकतामा राख्नुपर्नेमा उहाँले जोड दिनुभयो ।