सामुदायिक वनमा लुकाइएका ६ नाल भरुवा बन्दुक बरामद

तौलिहवा(कपिलबस्तु), साउन २७ गते । कपिलवस्तुको वाणगंगा नगरपालिका ९ जिनुवास्थित खोजिपुर सामुदायिक वनबाट प्रहरीले लुकाइछिपाइ राखिएको अवस्थामा ६ नाल भरुवा बन्दुक बरामद गरेको छ ।
इलाका प्रहरी कार्यालय पिपराबाट खटिएको प्रहरी टोलीले वन क्षेत्रमा खोजतलास गर्ने क्रममा बेवारिसे अवस्थामा लुकाइराखिएका भरुवा बन्दुक फेला पारेको जिल्ला प्रहरी कार्यालय कपिलवस्तुले जनाएको छ ।
जिल्ला प्रहरी कार्यालय कपिलवस्तुका प्रहरी निरीक्षक दीपक कुँवरका अनुसार बरामद भएका बन्दुक कसले र के प्रयोजनका लागि जंगलमा लुकाएर राखेको भन्ने विषयमा अनुसन्धान भइरहेको छ । घटनामा संलग्न व्यक्तिको पहिचान तथा खोजीका लागि प्रहरी परिचालन गरिएको उहाँले बताउनुभयो ।
बरामद भएका अवैध हातहतियारका सम्बन्धमा थप अनुसन्धान गरी आवश्यक कानुनी प्रक्रिया अगाडि बढाइएको प्रहरीले जनाएको छ ।