कपिलबस्तु, भदौ ८ गते । सशस्त्र प्रहरी बल नेपाल नं. ५ विन्ध्यवासिनी बाहिनी मुख्यालय रुपन्देहीको नवौं स्थापना दिवस समारोह सम्पन्न भएको छ । कपिलवस्तुको चन्द्रौटामा आइतबार आयोजित समारोहमा सशस्त्र प्रहरी महानिरीक्षक नारायणदत्त पौडेलले संगठनले हासिल गरेको व्यावसायिक उपलब्धिलाई व्यक्तिगत स्वार्थभन्दा राष्ट्रहितमा प्रयोग गर्न निर्देशन दिनुभएको छ ।
समारोहका प्रमुख अतिथि महानिरीक्षक पौडेलले समयअनुकूल सुरक्षा रणनीति अवलम्बन गर्दै उच्चस्तरीय अनुशासन कायम गर्न निर्देशन दिनुभयो । नागरिकको सेवा, शान्ति सुरक्षा तथा अमनचयन कायम गर्ने कार्यमा सशस्त्र प्रहरी थप जिम्मेवार भएर लाग्नुपर्ने उहाँले बताउनुभयो ।
मानव अधिकारको सम्मान गर्दै आवश्यकताअनुसार मात्र बल प्रयोग गर्नुपर्नेमा जोड दिँदै उहाँले सीमा सुरक्षा राष्ट्रको संवेदनशील विषय भएकाले सीमामा हुने गतिविधिको सूक्ष्म निगरानी गर्न निर्देशन दिनुभयो ।
पछिल्लो समय सीमा क्षेत्रमा हुने लागूऔषध ओसारपसार तथा नियन्त्रणका लागि विशेष ध्यान दिनुपर्ने बताउँदै महानिरीक्षक पौडेलले सशस्त्र प्रहरी सीमा सुरक्षाको पहिलो पहरेदार भएकाले निष्पक्ष र जिम्मेवार ढंगले काम गर्नुपर्ने उल्लेख गर्नुभयो ।
विपद् व्यवस्थापनको क्षेत्रमा पनि सशस्त्र प्रहरीले सक्रिय भूमिका निर्वाह गर्नुपर्ने उहाँको भनाइ छ । विपद् व्यवस्थापन एक्लो प्रयासबाट सम्भव नहुने भएकाले सबै सरोकारवाला निकायसँग समन्वय र सक्रियताका साथ काम गर्न उहाँले निर्देशन दिनुभयो । वर्तमान सरकारको सुशासनको अवधारणालाई आत्मसात गर्दै संगठनको नीति तथा निर्देशनअनुसार अघि बढ्नसमेत उहाँले आग्रह गर्नुभयो ।
समारोहमा विभिन्न समयमा कर्तव्यपालनका क्रममा मृत्यु भएका सशस्त्र प्रहरी कर्मचारीका परिवारलाई सम्मान गरिएको थियो । साथै विभिन्न विधामा उत्कृष्ट कार्यसम्पादन गर्ने सशस्त्र प्रहरी कर्मचारीलाई सम्मान तथा पुरस्कार प्रदान गरिएको थियो ।
बाहिनीपति सशस्त्र प्रहरी नायव महानिरीक्षक दीपक अधिकारीले बाहिनीको स्थापना तथा हालसम्म भएका गतिविधिबारे जानकारी गराउनुभएको थियो ।
वि.सं. २०७५ भदौ ७ गते स्थापना भएको नं. ५ विन्ध्यवासिनी बाहिनी मुख्यालय अन्तर्गत १२ जिल्ला रहेका छन् । बाहिनीअन्तर्गत आठ वटा गण, छ वटा गुल्म, एक वटा मद्दती सेवा गुल्म, नौ वटा सीमा सुरक्षा गुल्म, ५० वटा बीओपी, २७ वटा सुरक्षा बेस र पाँच वटा एफओबी गरी कुल १०६ वटा इकाइ रहेका छन् ।
