हेटौँडा, भदौ १६ गते । पृथ्वीराजमार्गअन्तर्गत धादिङको कृष्णभीरमा सडक अवरुद्ध भएपछि हेटौँडा हुँदै काठमाडौँ आवतजावत गर्ने सवारी साधनका लागि वैकल्पिक रुट तोकिएको छ ।
जिल्ला प्रशासन कार्यालय मकवानपुरले सोमबार साँझ सूचना जारी गर्दै बढ्दो सवारी चापलाई व्यवस्थित गरी सुरक्षित र सहज आवागमनका लागि विभिन्न प्रकारका सवारी साधनलाई छुट्टाछुट्टै मार्ग प्रयोग गर्न अनुरोध गरेको हो ।
प्रशासनका अनुसार १० चक्कासम्मका सबै मालवाहक तथा ठुला यात्रुवाहक सवारी साधनले काठमाडौँ जाँदा त्रिभुवन राजपथ र फर्किंदा कान्ति राजमार्ग प्रयोग गर्नुपर्नेछ । मौसम तथा सडकको अवस्थालाई ध्यानमा राख्दै कान्ति राजमार्ग हुँदै हेटौँडातर्फ आउने यात्रुवाहक सवारी साधनलाई साँझ ६ बजेभित्र मकवानपुरको इलाका प्रहरी कार्यालय ठिङ्गन चेकपोस्ट पार गरिसक्न जिल्ला प्रशासन कार्यालय मकवानपुरका प्रशासकीय अधिकृत सन्तोष सुवेदीले अनुरोध गर्नुभएको छ ।
उहाँका अनुसार १४ सिटभन्दा कम क्षमताका साना यात्रुवाहक सवारी साधनले हेटौँडा आउँदा फर्पिङ–फाखेल–कुलेखानी–भीमफेदी र काठमाडौँ जाँदा भीमफेदी–कुलेखानी–सिस्नेरी–दक्षिणकाली रुट प्रयोग गर्नुपर्नेछ ।
मकवानपुरको त्रिखण्डीनजिक रहेको बेलिब्रिजको भारवहन क्षमता कमजोर रहेको भन्दै इन्धन तथा भारी मालवाहक सवारी साधनलाई उक्त पुल प्रयोग नगरी छेउमा रहेको डाइभर्सनबाट आवतजावत गर्न प्रशासनले आग्रह गरेको छ ।
विपद्जन्य अवस्था रहेकाले अत्यावश्यक अवस्थामा मात्र यात्रा गर्न, राजमार्गमा सवारी चालकले धैर्य र अनुशासनपूर्वक पालोअनुसार सवारी सञ्चालन गर्न तथा ओभरटेक नगर्न प्रशासनले अनुरोध गरेको छ ।
ट्राफिक व्यवस्थापनमा खटिएका सुरक्षाकर्मी तथा ट्राफिक प्रहरीको निर्देशन पूर्ण रूपमा पालना गर्न र सवारी आवागमन सहज बनाउन सहयोग गर्न चालक, यातायात व्यवसायी तथा यात्रुलाई प्रशासनले आग्रह गरेको छ ।
