तुइन खोलामा पहिरो रोकथामको कार्य अघि बढाउन नारायणगढ-मुग्लिन सडकखण्ड सोमबार बिहानदेखि आंशिक रूपमा बन्द हुने भएको छ।
पृथ्वी राजमार्गको कृष्णभीर खण्डमा भइरहेको सडक मर्मतको समयलाई सदुपयोग गर्दै तुइन खोलाको जोखिमयुक्त माटो कटान गर्न स्थानीय प्रशासनले निश्चित समय तालिका तोकेर मात्र सवारी आवागमन सञ्चालन गर्ने निर्णय गरेको हो।
जिल्ला प्रशासन कार्यालय चितवनका अनुसार पहिरो व्यवस्थापन कार्यका लागि दिनभर सडक रोकिने भए पनि यात्रुको सहजताका लागि निश्चित समयमा सवारी पास गराइनेछ।
सडक बिहान ८ बजेदेखि ८ः३० बजेसम्म, १०ः३० बजेदेखि ११ बजेसम्म, दिउँसो १ बजेदेखि १ः३० बजेसम्म, दिउँसो ३ः५० देखि ४ बजेसम्म र साँझ ६ बजेपछि मात्र नियमित रूपमा खुला गरिनेछ।
यी तोकिएका समयबाहेक अन्य समयमा भने सवारीसाधन पूर्ण रूपमा रोकेर काम गरिनेछ।
चितवनका प्रमुख जिल्ला अधिकारी गणेश अर्यालले सूचना जारी गर्दै कृष्णभीरको मर्मत सम्पन्न भई आवागमन नियमित नहुञ्जेलसम्म तुइन खोलामा यो व्यवस्था लागू रहने जानकारी दिएका छन्।
‘कृष्णभीरमा सडक मर्मत कार्य जारी रहेको समयको सदुपयोग गरी नारायणगढ-मुग्लिन सडकको तुइन खोला परियोजनाको माटो कटान कार्य गरिनेछ,’ प्रमुख जिल्ला अधिकारी अर्यालद्वारा जारी सूचनामा भनिएको छ।
तुइन खोला खण्डमा बारम्बार माथिबाट पहिरो खसेर सडक अवरुद्ध हुने र जनधनको जोखिम उच्च रहने गरेको छ। सोही जोखिम न्यूनीकरण गर्नका लागि समय-समयमा खसिरहने पहिरोको माथिल्लो भागमा रहेका र झर्न सक्ने कमजोर माटो तथा ढुङ्गा पन्छाएर पहिरो व्यवस्थापन गर्न लागिएको प्रशासनले जनाएको छ।
