भैरहवा, भदौ २२ गते । रुपन्देहीको लुम्बिनी सांस्कृतिक नगरपालिका–१० स्थित थाई मन्दिर नजिकबाट ब्राउन सुगरजस्तो देखिने खैरो पदार्थसहित चार जना पक्राउ परेका छन्।
लागुऔषध नियन्त्रण ब्युरो शाखा कार्यालय भैरहवा र इलाका प्रहरी कार्यालय लुम्बिनीबाट खटिएको संयुक्त प्रहरी टोलीले दुई वटा मोटरसाइकल चेकजाँच गर्ने क्रममा २५ ग्राम ९०० मिलिग्राम खैरो पदार्थ बरामद गरेको हो।
प्रहरीका अनुसार लु ३९ प ६२१० र लु १४ प ३७६५ नम्बरका मोटरसाइकलमा सवार राजेश प्रसाद तेली, राजेश कुमार तिवारी, आजिजु राहमान मुसलमान र कृपा शंकर उपाध्यायलाई नियन्त्रणमा लिइएको हो।
इलाका प्रहरी कार्यालय लुम्बिनीका प्रहरी निरीक्षक होमनाथ रेग्मीले चेकजाँचका क्रममा शङ्कास्पद पदार्थ फेला परेपछि चारै जनालाई नियन्त्रणमा लिइएको बताउनुभयो। बरामद पदार्थको परीक्षण तथा घटनाबारे थप अनुसन्धान भइरहेको उहाँले जानकारी दिनुभयो।
पक्राउ परेका चारै जनामाथि लागुऔषधसम्बन्धी कसुरमा आवश्यक कानुनी प्रक्रिया अघि बढाइएको प्रहरीले जनाएको छ।
