नवलपरासी (बर्दघाट सुस्ता पूर्व), असोज २६ । नवलपरासी (बर्दघाट सुस्ता पूर्व) को कावासोती नगरपालिका–८ थकाली चोकमा अज्ञात वस्तु काट्ने क्रममा अचानक पड्किँदा दुई जना घाइते भएका छन् ।
सोमबार बिहान कावासोती नगरपालिका–१७ अमलटारीघाटस्थित नारायणी नदीको किनारमा फेला परेको अज्ञात वस्तु घरमा ल्याएर हेक्सा ब्लेडले काट्ने क्रममा पड्किँदा दुई जना घाइते भएका हुन् ।
प्राप्त विवरणअनुसार मध्यबिन्दु नगरपालिका–३ ब्रह्मस्थानका ४९ वर्षीय एकासी बोटेले नदी किनारमा उक्त वस्तु फेला पारेका थिए । बाहिरी भागमा डोरीजस्तो वस्तुले बेरिएको, भित्री भाग फलामजस्तो देखिने तथा बेलनाकार उक्त वस्तु करिब दुई फिट लामो र १४ इन्च गोलाइको रहेको बताइएको छ ।
बोटेले घरमा ल्याएको उक्त वस्तु सोमबार बिहान करिब ११ः२० बजे भारतको मोतिहारी घर भई हाल कावासोती नगरपालिका–८ थकाली चोकमा बस्दै आएका २८ वर्षीय सचिन कुमारसँग मिलेर काट्ने क्रममा अचानक पड्किएको थियो ।
