काठमाडौं । राष्ट्रिय स्वतन्त्र पार्टी (रास्वपा)का प्रमुख सचेतक कविन्द्र बुर्लाकोटीले अडियो प्रकरणमा दोषी देखिए सांसद खगेन्द्र सुनारमाथि कारबाही हुने बताउनुभएको छ ।
मंगलबार काठमाडौंमा सञ्चारकर्मीसँग कुरा गर्दै उहाँले सुनारको अडियो प्रकरणबारे पार्टीको केन्द्रीय अनुशासन आयोगले छानबिन सुरु गरिसकेको जानकारी दिनुभयो ।
छानबिन पूरा नहुँदासम्म सुनारलाई पदीय हैसियतमा औपचारिक कार्यक्रममा सहभागी नहुन निर्देशन दिइएको उहाँले बताउनुभयो ।
अडियोसँग सम्बन्धित प्रमाण सार्वजनिक भएकाले त्यसको सत्यतथ्य पत्ता लगाउन आयोगलाई जिम्मेवारी दिइएको उल्लेख गर्दै बुर्लाकोटीले कानुन आकर्षित हुने अवस्था आए राज्यका सम्बन्धित निकायले गर्ने अनुसन्धानमा पार्टीले पूर्ण सहयोग गर्ने स्पष्ट पार्नुभयो ।
अनुशासन आयोगको छानबिनबाट गल्ती पुष्टि नभए कारबाही नहुने र दोषी देखिए पार्टीको नियमअनुसार कारबाही गरिने उहाँले बताउनुभयो ।
