कपिलवस्तु । हिन्दू धर्मावलम्बीहरूको महान् पर्व बडादशैंको अवसरमा कपिलवस्तु जिल्लाभर ५१३ वटा दुर्गा मूर्ति स्थापना गरिएका छन्। दुर्गा भवानीप्रतिको श्रद्धा, आस्था र भक्तिभाव प्रकट गर्दै जिल्लाका विभिन्न स्थानमा स्थापना गरिएका मूर्तिका कारण यतिबेला कपिलवस्तु धार्मिक तथा सांस्कृतिक रौनकले सजिएको छ।
दशैंलाई असत्यमाथि सत्य र अधर्ममाथि धर्मको विजयका रूपमा मनाउने धार्मिक मान्यता छ। विशेषगरी दुर्गा पक्षका रूपमा मनाइने यस पर्वमा शक्तिस्वरूपा देवी दुर्गाको पूजा–आराधना गर्दै सुख, शान्ति, समृद्धि तथा परिवारको कल्याणको कामना गरिन्छ। यही धार्मिक परम्परालाई निरन्तरता दिँदै कपिलवस्तुका विभिन्न स्थानमा दुर्गा मूर्ति स्थापना गरी विधिपूर्वक पूजा–आराधना गरिँदै आएको छ। जिल्ला प्रहरी प्रमुख प्रहरी उपरीक्षक मनोहर भट्टका अनुसार कपिलवस्तुका १० स्थानीय तहमा गरी कुल ५१३ वटा दुर्गा मूर्ति स्थापना गरिएका छन्।
ती मूर्तिहरूको विसर्जन कार्यक्रम कात्तिक ३ गतेदेखि ९ गतेसम्म सञ्चालन हुने उहाँले जानकारी दिनुभयो। स्थानीय तहगत विवरणअनुसार कपिलवस्तु नगरपालिकामा सबैभन्दा बढी ९६ वटा मूर्ति स्थापना गरिएका छन्। कृष्णनगर नगरपालिकामा ८६, बुद्धभूमि नगरपालिकामा ६८, यशोधरा गाउँपालिकामा ५५, महाराजगञ्ज नगरपालिकामा ४४, शिवराज नगरपालिका र विजयनगर गाउँपालिकामा ३८–३८, शुद्धोधन गाउँपालिकामा ३६, मायादेवी गाउँपालिकामा २८ तथा वाणगंगा नगरपालिकामा २४ वटा मूर्ति स्थापना गरिएको छ।
दशैंका अवसरमा स्थापना गरिएका दुर्गा मूर्तिहरूमा देवीका विभिन्न स्वरूपलाई कलात्मक रूपमा प्रस्तुत गरिएको छ। आकर्षक सजावट, पूजापाठ र धार्मिक अनुष्ठानले मूर्ति स्थापना गरिएका क्षेत्रहरूमा भक्तिमय वातावरण सिर्जना गरेको छ। देवी दुर्गाको दर्शन तथा पूजाआराधनाका लागि श्रद्धालुहरू मूर्ति स्थापना गरिएका स्थानमा पुग्ने गरेका छन्।
कपिलवस्तुको तौलिहवा बजार क्षेत्रमा स्थापना गरिएका दुर्गा मूर्तिहरूले पनि पर्वको धार्मिक तथा सांस्कृतिक महत्त्वलाई झल्काएका छन्। मूर्ति विसर्जनका लागि निर्धारित समय नजिकिँदै जाँदा जिल्लाका विभिन्न स्थानमा धार्मिक विधि र परम्पराअनुसार विसर्जनको तयारीसमेत भइरहेको छ। दशैं केवल धार्मिक पर्व मात्र नभई पारिवारिक पुनर्मिलन, आपसी सद्भाव, सामाजिक एकता र सांस्कृतिक पहिचानसँग जोडिएको उत्सव पनि हो।
दुर्गा भवानीप्रतिको आस्था र विश्वासका साथ मनाइने यस पर्वले समाजमा शान्ति, सद्भाव र सकारात्मकताको सन्देश प्रवाह गर्दै आएको छ।
