बडादशैं मनाउन राजधानी काठमाडौं छाडेर गाउँघर फर्किने यात्रुको सङ्ख्या बढेसँगै काठमाडौं उपत्यकाका सडकमा सवारी चाप घट्दै गएको छ। दशैंका लागि उपत्यकाबाट बाहिरिने यात्रुको सङ्ख्या बढेपछि सार्वजनिक यातायातमा समेत यात्रुको चाप कम हुन थालेको हो।
काठमाडौं उपत्यका ट्राफिक प्रहरी कार्यालयका अनुसार घटस्थापनादेखि कार्तिक गतेसम्म ४ लाख २३ हजार ६६४ जना यात्रुले उपत्यका छाडेका छन्।
ट्राफिक प्रहरीको तथ्याङ्कअनुसार असोज २५ देखि ३० गतेसम्म उपत्यका छाड्ने यात्रुको सङ्ख्या उल्लेख्य रूपमा बढेको छ। यस अवधिमा सबैभन्दा बढी असोज २९ गते ८५ हजार ५६१ जना यात्रुले उपत्यका छाडेका थिए।
दशैं मनाउन घर फर्किने क्रम तीव्र भएसँगै उपत्यकामा चल्ने सार्वजनिक सवारीसाधनमा यात्रुको चाप घट्न थालेको छ। सामान्य दिनमा व्यस्त रहने सडकमा समेत सवारीसाधनको चाप कम हुँदै गएको छ।
दशैंमा यात्रुको चाप व्यवस्थापन गर्न मध्यम तथा लामो दूरीका सवारीसाधनलाई रुट परमिट खुला गरिएपछि स्थानीय रुटमा सञ्चालन हुने कतिपय सवारीसाधनसमेत यात्रु लिएर उपत्यकाबाहिर जान थालेका छन्। रिजर्भमा यात्रु लिएर बाहिरिने सवारीसाधनको सङ्ख्या बढ्दा उपत्यकाभित्र सञ्चालन हुने सार्वजनिक यातायातको सङ्ख्यासमेत घट्न थालेको छ।
दशैं मनाउन घर फर्किने क्रम जारी रहेकाले आगामी दिनमा उपत्यकाका सडकमा सवारी चाप थप घट्ने अपेक्षा गरिएको छ।
