कोरोना संक्रमितका कुरुवा र सुरक्षाकर्मीहरुलाई निशुल्क खाना नास्ता

कपिलवस्तु, ३ अषाढ । कोभिड संकट विरुद्ध मानवीय सेवा भावले नागरिक स्तरमा गठन गरिएको साझा प्रयास अभियान र मधेश मानव अधिकार गृहको पहलमा कोरोना संक्रमित विरामीका कुरुवा र सुरक्षाकर्मीहरुलाई निशुल्क खाना नास्ता खुवाउने कार्यक्रम संचालन गरिएको छ । अमेरिका स्थित एशोसिएन अफ नेपाल तराईन ईन अमेरिका नामक संस्था, कपिलवस्तु नगरपालिका र फेसबुक क्याम्पेनि∙बाट जोडिएका विभिन्न दाताहरुको सहयोगबाट यो कार्यक्रम संचालन गरिएको साझा प्रयास अभियानका संयोजक रवि ठाकुरले बताए ।
कोरोना अस्थायी अस्पताल तौलिहवामा रहेका विरामीका कुरुवाहरुलाई निशुल्क खाना नास्ता वितरण गरिएको छ । यसै गरी तौलिहवा क्षेत्रमा लक डाउनका अवधिमा खटिएका सुरक्षाकर्मीहरुलाई चिया नास्ता वितरण गरिएको अभियानकी स्वयंसेवक लक्ष्मी चौरसियाले बताईन् ।
यसरी संचालन गरिएको निशुल्क खाना नास्ता वितरणको यो कार्यक्रम चौथो हप्तामा पुगेको छ । अभियानलाई सघाउन विभिन्न व्यक्तिहरुले स्वतस्फुर्त रुपमा गरेको सहयोग रकमको पारदर्शी ढंगबाट पूर्ण सदुपयोग गरिने अभियानका संयोजक ठाकुरले बताए । कार्यक्रमको समापन पछि सामाजिक परीक्षणबाट खर्च सार्वजनिक गर्छौं, संयोजक ठाकुरले भने, “अभियानले जिल्लाका विभिन्न स्वास्थ्य संस्थाहरुमा स्थानीय तहको लागत सहभागितामा अक्सिजन कन्सन्टेटर मेशिन समेत वितरण गर्ने कार्यक्रम शुरु गरेका छौं ।”
अभियानमा तौलिहवा उद्योग वाणिज्य संघका अध्यक्ष गयादीन कुर्मी, लुम्विनी विकास कोषका सदस्य राजेश ज्ञवाली, कपिलवस्तु निर्माण व्यवसायी संघका अध्यक्ष गुन्जन कुमार गुप्ता, नेपाल पत्रकार महासंघका अध्यक्ष किरणमान बज्राचार्य, नेपाल निर्माण व्यवसायी संघ प्रदेश समितिका उपमहासचिव दिनेश हमाल, उद्योगी सन्दिप गुप्ता, निर्माण व्यवसायी अशोक गुप्ता, नेपाल प्रेस यूनियनका सभापति गोपाल भण्डारी, नेपाल औषधी व्यवसायी संघका जिल्ला कोषाध्यक्ष मति प्रसाद घिमिरे लगायतका नागरिक अगुवाहरु सदस्य रहेका छन् ।